Самырык-влакын усталык коллективыштын фестивальышт кодшо шуматкечын Советский посёлкыш Кужэҥер, Медведево, Морко, Параньга, Шернур да Советский районла гыч 17 коллективым чумырен.
Шымше гана эртаралтше пайремыш толшо уна-влак ончыч таҥошкылмашке ушненыт. Вара нуным тӱҥ сценыште ты кундемын чапланыше эпический персонажше-влак – Кундыш Кугыза ден Чачавий уныкаже – вашлийыныт. Мотор ӱдыр-влак кинде-шинчал дене сийленыт да куштымаш йырыш ушеныт.
Фестиваль кышкарыште «Эн самырык уста коллективым», «Эн сай кудым» ойыреныт. Ансамбль-влак коклаште ончыл верыш Шернур районысо Кукнур тӱвыра пӧртын «Пеледыш» ансамбльже (вуйлатышыже Анатолий Конаков) лектын. Кокымшо ден кумшо верыште Советский районысо В.Д.Бурлаков лӱмеш Кужмарий тӱвыра пӧртын «Эр ӱжара» (вуйлатышыже Александр Пуртов), тыгак Морко районысо тӱвыра да каныме рӱдерын «Рвезылык» (вуйлатышыже Александр Якушев) ден Кужэҥер районысо тӱвыра да каныме рӱдерын «Шымавий» (вуйлатышыже Ольга Сергеева) ансамбльышт-влак лийыныт.
Посна номинацийлаштат икмыняр коллективым палемденыт. А теве «Эн сай кудым» тӱзатымашке 7 коллектив ушнен. Тышеч кум лауреатым палемденыт. Икымше верыш Кукмарий тӱвыра пӧрт гыч «Весела кумыл» ансамбль (вуйлатышыже Надежда Волкова) лектын .
«Шокто, шокто гармонетым» конкурсышто индеш уста еҥ таҥасен. Икымше степенян лауреат лӱмым Кельмаксола гыч Леонид Ермаков сеҥен налын. Моло сеҥыше дене пырля изирак ийготан гармоньчо-влакымат палемденыт. Тиде нунылан ончыкыжым шке усталыкыштым шуараш шӱкалтыш лийшаш, очыни.
Снимкыште: фестиваль годым.
Фотом республикысе Калык усталык рӱдерын воткыл лаштыкше гыч налме.
