СОЦИАЛ ИЛЫШ Туризм

«Тудынат Сеҥымашлан надырым ыштымыже шуын»

Морко район Волаксола школышто тунемше-влакым шочмо элым йӧраташ да аралаш кӱлмӧ шӱлышеш куштат

Тиде кундем гыч Россий Вооруженный вийын Украиныште эртарыме специальный военный операцийыште шуко пӧръеҥ участвоватла: кӧжӧ мобилизацийыш логалын, кӧжӧ шке кумылын каен. Чаманен палемдаш кодеш, сӧй пасушто вуйым пыштыше-шамычат улыт. Нунын лӱмышт ынде курымашлыкыш каен. Тидланже верысе школ тоштерыште стендым ыштыме.

Волаксола школышто СВО-н участникше-влак дене вашлийын мутланыме, сӧй пасушто вуйым пыштыше военнослужащий-шамычым шарныме, гуманитар грузым чумырен колтымо да тунемше-влакым шочмо элым йӧратыме шӱлышеш куштымо шотышто кугу паша шукталтеш.

Ик ий наре ончыч тиде школышто Дмитрий Геннадьевич Рябчиковым шарныме лӱмеш Геройын партшым почыныт. Волаксола кундемын патыр эргыже Пумыр ялыште шочын-кушкын, верысе школым тунем пытарен. СВО-шко мобилизаций дене кайыше-влакын икымше тӱшкаштыже лийын. 2023 ий июньышто тушман дене вашпижмаште геройла колен.

Геройын партшым почмо торжественный мероприятийышке школын выпускникше, СВО-н участникше-влак Евгений Токташев ден Николай Семёнов толыныт. Нуно тиде жаплан лачак отпускышто лийыныт, боевой йолташыштым пырля шарналташ кумылын ушненыт.

Эртыше ий сентябрьыште Дмитрий Рябчиковымак шарныме лӱмеш куштылго атлетике дене кросс эртаралтын. Мероприятийыш геройын пелашыж ден эргыже, ачаж ден аваже толыныт.

Йоча-влакым шочмо элым йӧратыме шӱлышеш куштымо пашаш Морко посёлкысо «Память» мер организацийын еҥже-шамычат ушненыт. Боевой действий-влакын да военный службын ветеранышт жапын-жапын школышко толыт, тунемше-шамычым сарзе паша дене палдарат, тыгак шочмо элым йӧраташ да аралаш  кумылаҥдат.

– Отпускыш толшо выпускникна Артём Порфирьеват йоча-влак дене кумылын вашлие. Ӱдыр-рвезе-шамычлан школышто тунеммыже, армийыште служитлымыже, СВО-шко шке кумылын кайымыж нерген веле огыл каласкалыш,  шочмо элым, ача-авам йӧраташ да аралаш кӱлмӧ нергенат шӱм-чоным тарватен ойлыш. Йоча-влак тудым пеш тӱткын колыштыч, эсогыл икмыняр йодышыштым рашемдышт. Тунемше-шамычым эскерымем годым чурийышт вашталтмым, шинчавӱдышт лекмым ужым да шӱмышт эше кӱэмалтше огыл, весын чонжым шижын да умылен моштышо манын шоналтышым, – палдарыш школ директорын туныктымо паша шотышто алмаштышыже Людмила Николаева. – Шкеже эше 4-ше классым вуйлатем. Икшыве-влак изирак улыт гынат, СВО нерген кажне кечын веле огыл, кечеш икмыняр гана мутланаш ямде улыт. Дрон нерген пеш сайын палат. Ала сайлан, ала удалан, но мемнан кундемыште Курск, Запорожск да Херсон областьла, Донецк да Луганск калык республикла гыч эвакуироватлыме еҥ-влак эше огыт иле, сандене сарын тыгай азапше дене чак палыме огытыл. Тидым радиом колыштын, телевизорым ончен, интернет лаштыклаште лудын да «Кӱлешан нерген мутланымаш» класс шагатыште палдарыме гоч веле пален налыт.

Туге гынат, тунемше-влак СВО-што участвоватлыше сарзе, Российыш угыч ушымо регионлаште илыше-шамычлан полшаш кӱлмым сайын умылат. Теҥыз флот ветеран-влакын Морко районысо «Флагман» мер организацийыштын тӱҥалтышыж почеш СВО-м эртарыме кумдыкыш гуманитар грузым тылзе еда чумырен колтат. Школыштына чылаже 66 йоча тунемеш. Кажныже мо дене гынат пайдам ыштынеже: икте кочкыш продуктым конда, весе – шокшо вургемым, кумшо – гигиенылан средствым, нылымше – оксам… Чыланат окопышто пайдаланыме сортам велаш кумылан улыт. А эше нуно 1 тоннат 51 килограмм макулатурым поген сдатленыт да тудлан пуымо 6 тӱжем теҥге оксам адакат «Флагман» организацийыш сарзе-шамычлан таче кечылан кӱлшӧ сатум налаш колтеныт. Макулатурым погымо шотышто районышто рекордсмен семын палемдалтыныт.

Мер организацийым вуйлатыше Юрий Окуневын СВО-н участникше-влаклан шоган ден чеснокым погаш кӱлмӧ нерген мутым лукмекыже, тиде пашаш уло школ коллектив ушнен.

– Йоча-влакын шочмо элым йӧратымышт, фронтлан полшаш тыршымышт, нимучашдыме поро кумылышт пеш сайын коеш. Пытартыш кум тылзыште 13 килограмм чеснок ден 16 килограмм шоганым, 5 мужыр меж пижым, 9 мужыр меж носким, 32 ате консервироватлыме пакчасаскам, 5 ате вареньым, 10 килограмм шере кочкышым, 7 тӱжем теҥгеаш медикаментым, 31 тӱжем теҥге оксам поген, окрплык 125 сортам велен, 47 серышым возен колтенна, – каласкала Людмила Алексеевна. – Вуйлатыме классыштем шуко шочшан еш гыч ик тунемше уло. Шоган ден чеснокым пытартыш гана погымо жапыште тудо ик кугу шоганым конден. Тек иктым, но конден! Тудынат уло шӱм-чонжо дене Сеҥымашлан надырым ыштымыже шуын. Вес йоча ик чеснокым конден… Ала ешын тиде гана чеснокшо начарын шочын, но Сеҥымашым лишемдышашлан садак кеч ик вуй пакчасаскам да ойырен! Тыгайым ужын, эсогыл кумыл тодылалтеш.

СВО-шко гуманитар грузым чумырымо пашам школ директорын воспитаний шотышто алмаштышыже Эльвира Сергеева шукта. Тудын вуйлатымыж почеш тунемше-влак поснак декабрьыште – У ий вашеш – сарзе-шамычлан шуко шере кочкышым, меж носки ден пижым, консервироватлыме пакчасаскам поген колтеныт. Но эн чотшо салтаклан палемдалтше серышышт кумылым налын. Нуно  тушко уло шӱм-чон шокшышт ден йӧратымашыштым, ӱшаныштым пыштен возеныт.

Волаксола школышто ӱдыр-рвезе-влакым СВО-што участвоватлыше сарзе-шамычын ача-аваштланат тӱткышым ойыраш туныктат. Нунын дене У ий деч ончыч вашлийыныт, тыныс илышна верч йӱдшӧ-кечыже кредалше лӱддымӧ да патыр эрге-влакым ончен-куштымыштлан тауштеныт, шӱм-чоным лыпландарыше мутым ойленыт, почеламутым лудыныт, мурым муреныт да тидын дене Еш идалыкым мучашленыт.

…У ий да Рошто каникул эртен кайыш. Йоча-влак адакат парт коклашке шинчыныт. Нунын кокла гыч кажныже сайын тунемаш тырша, сарзе землякше-влак ончылно намысыш ынеж пуро, а урок деч вара окопышто пайдаланыме сортам вела, аваже але коваж пелен шинчын, пижерге ден носким пидеш, салтаклан серышым воза… Кажныже Сеҥымашым лишемдаш тырша.

Маргарита ИВАНОВА

Людмила Николаеван фотожо

 

 

 

 

 

 

Опубликовать в Одноклассники

Добавить комментарий