Лаштыкнан тачысе унаже – Йошкар-Олаште шочын-кушшо, а кызыт пелашыже да икшывыж дене пырля Саратов олаште илыше Павел КАЗАКОВ.
Музык тӱняште да муро аланыште Павел музыкант, йӱк режиссёр, аранжировщик семын палыме. Кеҥеж канышлан шочмо кундемышкыже пӧртылмыжым пален налмеке, самырык еҥ дене тунемме, паша корныжо да моло нерген мутланаш йӧн лекте.
– Павел, музыклан кунамрак шӱмаҥынат?
– Изинекак, очыни. Тидымак шижын, мыйым, шым ияшым, авам Национальный президент искусство школыш тунемаш колташ шонен пыштен. Тыгодымак 7-ше номеран школышкат документым пуэн улмаш. Сымыктыш школышто мастарлыкым тергымышт деч вара талантан икшыве-влак дене пырля тунемаш тӱҥалынам. Такшым ачамат музыкым йӧратен, мурылан почеламутымат возен, авамат мураш кертеш, самырыкше годым Йошкар-Оласе фабрикыште пашам ыштымыж годым ансамбльыш коштын.
Школышто тунемме годым гитар сем пеш келшен, варажым гармоньым, баяным да моло семӱзгарым шокташ тунемынам.
– Изиэт годым кӧ лияш шоненат?
– Йолташем-влак семын мыят футбол дене илышем кылдаш шоненам.
– Кушмо семын сем тӱняште утларак келшаш тӱҥалын?
– Тунам эше чылажым умыленат шуктен омыл докан. Туге гынат школ деч вара Палантай лӱмеш тӱвыра да сымыктыш колледжын калык семӱзгар пӧлкашкыже тунемаш пуренам. Тунам автомеханикат лийнем ыле, вет изинек автомашина дене модаш, ачам дене пырля кудалышташ, тудым ачалаш пеш келшен.
Туныктышем Олег Александрович Филипповлан профессионал улмыжлан моткоч кугу тау, тудын тыршымыж дене музык тӱня дене утларак авалталтынам. Ик ий тунеммеке, у баяным кидыш кучыктыштат, тунемаш да тӱрлӧ произведенийым шокташ кумылаҥдышт. Варажым балалайкым, фортепианом шокташ тунемым.
– Илышет туныктымо паша дене кылдаш шонен отыл?
– Уке, педпрактике годым тидым сайынак умыленам. Урокышто йоча-влаклан умылтарет-умылтарет, а нуно чыла мӧҥгешла ыштылыт.
Адакшым концертыште шоктышо музыкантат лияш шонен омыл: тунемме годым кажне арнян манме гай шокташ да тӱрлӧ олалашке лектын кудалышташ келшен огыл.
– Могай амал дене кумшо курсышто трукышто Саратов областьысе сымыктыш колледжыш тунемаш кусненат?
!!! Интервьюм тичмашнек 21 июльышто лекше «Марий Эл» газетыште лудса
А.БАЙКОВА
Фотом еш альбом гыч налме
