Козьмодемьянскысе В.И.Романов лӱмеш кава йымалсе этнографий тошерыште кызыт Санкт-Петербургышто илыше Юрий Васильевич Брутовын персональный ончерже почылтын.
Тудо шкеже Курыкмарий кундемын шочшыжо. Кидмастр шукертсек шке шке кундемысе марий-влакын вургемыштым, сылнештарышым уэмден ышта. Ончерыште тудын «Шу окса» — шӱйыш сакыме, «Почкама» — оҥыш сакыме наста-влакым, «Пелештанга» — пылыш кӧржым, «Ошпу» вуйчиемым, «Гайтан» монистом, «Шайл пач» кыдалыш ӱшталме сакышым ужаш лиеш.
Кидмастар нуным ХIХ курымысо образец-влак почеш уэмден ыштен. Ты пашаште тудо коваштым, ший оксам, кышкывийым, шерым, вынерым кучылтеш. Юрий Васильевич шукертсек РФ Тоштер фондын кугыжаныш каталогшым шымла. Шке пашаштыже погымо шинчымашыжлан эҥерта. Моло кидмастар-шамычат тудын деке каҥашым йодын толыт.
Ты ончерым эртараш Санкт-Петербург ден Ленинград областьыште Марий Элын представительствыже да Санкт-Петербургысо марий-влакын «Ший корно» калыкле-тӱвыра автономийышт полшен.
С.Носова
Снимкыште: Ю.Брутов
Авторын фотожо
