С.Чавайн, М.Шкетан, Н.Арбан, В.Гуркин, А.Островский, Н.Гоголь, Н.Коляда, Ф.Шиллер, а ынде – У.Шекспир!..
5,6 февральыште М.Шкетан лӱмеш Марий национальный драме театр Шекспирын «Укрощение строптивой» пьесыж почеш шындыме «Торешвате» спектакльым ончыктыш. Волгыдо, поро шӱлышым шочыктышо да тыгодымак шонаш таратыше постановкым зал тич погынышо калык шокшын вашлие, а мучашлан, кынел шогалын, кужу жап совым кырен тауштыш.
Спектакльым сценыш лукмаште режиссёр Роман Алексеев дене пырля художник-постановщик Сергей Таныгин, вургем сӱретче Лариса Воробьёва, композитор Валерий Кульшетов тыршеныт.
Постановкын тӱҥ героиньыже – Катарина. Ты рольым режиссёр самырык актрисе Светлана Александрова ден Марий Элын калык артистше Светлана Строгановалан пуымыж дене нимынярат йоҥылыш лийын огыл. Нуно осал йылман, торжа койыш-шоктышан поян ӱдырын образышкыже келгын пурен моштеныт. Спектакльыште Катаринан илышыже, тудын вашталтмыже, тыгак пӧръеҥ ден ӱдырамаш кокласе кыл нерген ойлалтеш.
Петруччон рольжым Марий Эл Кугыжаныш премийын лауреатше Павел Ефимов ден Марий Элын сулло артистше Артем Асмаев модыныт. Актёр-влакын пеҥгыдын да ӱшандарышын мутланымышт, тугак ошкылын колтымышт, шкем сценыште кучымышт кумылым нӧлтыш.
А постановкын мучашыже эсогыл шинчавӱдымат лукто: Катаринан монологшо чонышкак логале. Тӱҥалтышлан чыла шотыштат торешланыше ӱдыр, пелаш лиймеке, тӱрыс вашталтын, койыш-шоктышыж денат шыма, илышым умылышо лийын. Марийжым аклен, тудым элым аралыше дене таҥастарымыже, чынжымак, шӱмыш витыш. Тугеже икмыняр курым ончыч авторын возымыжо кызытат калыклан лишыл. Тидак огыл мо усталык коллективын сеҥымашыже?!
Спектакль пытымеке, композитор, Марий Эл Кугыжаныш премийын лауреатше Григорий Архипов ты шотышто куанжым тыгерак палемдыш:
– Артист-шамычын модмышт моткоч келшыш, поснак Алексей Сандаковын Гортензиожо, Евгений Сергеевын Бьонделложо, Сергей Даниловын Гремиожо. Браво! Чоныш логалшын, пеш куштылгын, чаплын образым чоҥеныт. А Светлана Александрова нерген ойлыманжат огыл! Кузе мастарын модеш, мыняр вий, чытыш… Лариса Воробьёва моткоч ойыртемалтше костюмым ямдылен, тӱс-шамычымат келыштарен моштен, тыге тудо герой-влакын характерыштым почаш полшен. Режиссёр Роман Юрьевич чынжымак кугу пашам ыштен. Театр коллективым сай премьер дене саламлем. Шекспирын почеламут корно дене возымо пьесыжым марлашке кусараш куштылгыжак лийын огыл докан, но спектакльым ончымо годым йылме моткоч яндарын, сылнын йоҥга.
Чыла шотыштат виян да сылне ты комедийым кажне еҥлан ончаш темлыме шуэш. Тиддеч вара ала-кудыжо, товат, шке еш илышыжым аклен ончалаш кумылаҥеш.
Алевтина Байкова
В.Тумбаевын фотожо
