Тений республикыште икмыняр тӱвыра пӧртым олмыктымо да олмыктышаш нерген газетыштына ик гана веле огыл возенна ыле. Теве кызыт У Торъял районысо Чӱксола ялыште тыгай паша кая. Тушто ты сомыл «Культур» нацпроект дене келшышын шукталтеш.
- Май кыдалне тушко командировкыш мийымына годым шкеат ужна. Да тидым веле огыл, а ончыкыжым уэмдалтше тӱвыра пӧрт могай лийшашымат. Вет тудын ваштарешыже, корно воктеке, шкешотан вывескым вераҥдыме. А туштыжо фотосӱрет уло. Тудын тӱжвал велже ош, йошкар да сур тӱсан лиеш да торашке чотак волгалташ тӱҥалеш! Такшым тунамак урем велжым комыжленыт да моткоч сӧралын коеш ыле. А тачысе кечылан эше ик велыш пӱтынек да эше иктын пелышкыже кассет-влакым пижыкташышт кодын. Сандене кунам тӱрыс ыштен шуктат, эшеат сылне лиеш!
- Тыгак вывескыште ты пашам могай организаций шуктымым, молымат – возымо да пален налаш неле огыл. Тушечак рашемдышна: ты объектыште чоҥымо пашам Рамиль Габдрауфович Ахмадгазизов вуйлата (снимкыште). Меат тудымак кычал муна да мутым вашталтышна.
– Кызыт тыште оралтым капитально олмыктымо паша кая, – радамлын палдараш тӱҥале тудо. – Эн ончычак ме фасад дене кылдалтше пашам шуктенна. Йӱр, лум дене кладке манме ятыр вере тоштемын да катлен возын ыле. Сандене ончыч чыла тидым кораҥденна, пижын кодшо цементым эрыктенна. Икманаш, тӱҥалтыште оралтын тӱжвал велымже ондакысе пырдыж-негызше марте шуынна, вара вентилироватлыме фасадым чумырымо сомылым шуктенна. Умбакыже ме пырдыжым пеҥгыдемденна, кӱртньӧ каркас дене кучыктенна. Молан манаш гын, тудо шелышталташ тӱҥалше лийын. Тыгай сынан пашам тӱвыра пӧртыш пурымаштат ыштенна.
Каласкален пытарымекше, Рамиль Габдрауфович дене пырля будко гыч уремыш лекна. Тиде жапыште лачак тӱвыра пӧрт ӱмбалне икмыняр еҥ пашам ышта ыле. Ойлымыж почеш, тылеч ончычшо нуно тоштемше леведышым кораҥденыт. А тунам лачак у леведышым шареныт. Ты пагытыште тушто чылаже 12 еҥ тыршен. Нуно Йошкар-Оласе «Марспецмонтаж» акционер ушем гыч лийыныт.
Палдарыме почеш, тӱвыра пӧрт кӧргыштӧ гын нимом огыт ыште. Лач окнам гына вашталтат. Проект дене келшышын, чыла паша тӱжвалне веле шукталтшаш.
Вывескыште возымо дене келшышын, реконструкцийым тений 31 август марте ыштен шуктышаш улыт. Но чоҥымо пашам вуйлатышын ойлымыж почеш, нуно тылеч изиш ончычрак мучашлаш палемдат. А ыштен шуктымекышт, республикысе Тӱвыра, савыктыш да калык-влакын пашашт шотышто министерствын палдарымыж почеш, тыште Чӱксола ял шотан илемын тӱвырам вияҥдыме рӱдер лиеш. Тунамже тушко эше ик гана миен толаш кӱлеш, товатат…
Любовь Камалетдинова
М.Скобелевын фотожо
