Пайрем дене!
Теве кӧмыт деч тунемман!
Коркатово лицей манмеке, эн ончычак медицине вуз-влаклан абитуриентлам куштен ямдылыше тунемме заведений семын палемдат. Манаш веле, 2000 ий гыч 500 наре выпускникна тӱрлӧ вузышто медиклан тунем лектын да элна мучко тӱрлӧ вере пашам ышта.
Да тыште эн ончычак биологий ден химийым, экологийым туныктышо-влак Валентина Михайловна Васильеван, Раисия Александровна Новикован, Светлана Юрьевна Егорован надырыштым палемдыде ок лий. Икымшыже – РФ-н сулло туныктышыжо, Марий Элын калык туныктышыжо, Марий Эл образованийын сулло пашаеҥже. Кокымшыжо – РФ образованийын почётан пашаеҥже, Марий Эл образованийын сулло пашаеҥже. Коктынат «Россий Федерацийын эн сай туныктышыжо» конкурсышто ик гана веле огыл сеҥышыш лектыныт. А кумшыжо «Чонем йоча-влаклан пуэм» конкурсын муниципал да республик кӱкшытан йыжыҥлаштыже ойыртемалтын.
Икымшыжын 100 утла тунемшыже биологий да экологий дене олимпиадын тӱрлӧ кӱкшытыштыжӧ ончылно лийын. Кокымшыжын химий дене ЕГЭ-м сдатлыме годым пеш кӱкшӧ баллым погат. Кумшыжын экологий дене олимпиадыште пытартыш кум ийыште нылытын сеҥеныт, кудытын призёр лийыныт.
Теве кӧмыт деч примерым налыт мемнан туныктышына-влак да нунын семынак кушкын толыт. Шукынжо ӱдырамаш улыт. Ме чылаштым пайремышт дене саламлена. Пашаште уста, а ешыште пиалан да эреак таза лияш тыланена!
Морко район Коркатово лицейын пӧръеҥ туныктышыжо-влак.
Снимкыште: Светлана Егорова, Раисия Новикова, Валентина Васильева.
Лицей деч налме фото.
Мужыр лаштыкым Юрий ИСАКОВ ямдылен.
