С.Г.Чавайн лӱмеш калыкле книгагудо 2024 ий кум тылзе жапыште ыштыме пашажым иктешлен.
Республик мучко чылаже 264 книгагудо уло, тышеч 261-же районлаште да яллаште верланен. Оршанке районышто Тошто Крешын да Кугу Кугланур, Килемар районышто Пистерлӓ да Йылейӓл, Советский районышто Кукмарий, Параньга районысо Руш Лажмарий, Шернур районышто Кугу Мушко да Купсола, Марий Турек районышто Арбор библиотеке-влак тӱкылымаште шинченыт. Амалжым книгагудо пашаеҥ-влак уке улмым, нунын черланымыштым ончыктат.
Кум тылзыште чылаже 158, 9 тӱжем еҥым обслуживатлыме, кодшо ийын тыгаяк жапше дене таҥастарымаште, 11,2 тӱжем еҥлан (1%) шагалемын. Поснак Оршанке (13,8%), Марий Турек (6,6%) районлаште паша мӧҥгештмым палемдат. Отчёт сынан увер почеш, моло цифр-влакым ончалаш гын, лектыш сай, теве:
– библиотекылашке еҥ-влак 1151,8 тӱжем гана толыныт, тидыже 153,7 тӱжемлан (15,4%) шукырак;
– чылаже 6,8 тӱжем тӱшка мероприятийым эртарыме;
– книгагудо-влакын сайтыштым 225,5 тӱжем еҥ эскерен (56 процентлан шукырак). Но, чаманен каласыман, чыла библиотеке кокла гыч 170-же гына, тӱҥ шотышто рӱдӧ (илемла-влак кокласе) библиотеке-влак, интернет сетьыш ушненыт, яллаште тыгай йӧн уке.
– кугыжаныш да муниципальный библиотеке-влакын фондышкышт 21,4 документ пурен, тышеч 11,5 тӱжемже – у книга-шамыч.
Февраль тӱҥалтыште Москваште «Россия» ончер-форумышто эртаралтше всероссийский конференцийыш Марий Эл гыч вич бибилиотеке вуйлатыше миен коштын.
Л.СЕМЕНОВА
Снимкыште: Морко район Шеҥше книгагудын вуйлатышыже Людмила Яковлева Йоча книга арням эртара.
Фотом книгагудын соцкыл тӱшкаж гыч налме
