Пытартыш жапыште республикыштына веле огыл эртыше кугу, тӱрлӧ калыкым чумырышо мероприятийлаш Российын регионлаж гыч турист-влакат лӱмын толын коштыт. Кажне пайремже турист событийыш савырнен.
Пеледыш пайрем: кушто да кунам?
Икымше гана тудо 1920 ий 27 майыште Шернурышто палемдалтын. 2022 ий 30 майыште пайремлан кугыжаныш статусым пуымо. Кызыт тудым эн ончыч чыла гаяк районышто эртарат. Иктешлышыже марий рӱдолаште июньын кумшо шуматкечыжлан палемдалтын. Но тений тудым 27-28 июньлан кусарыме. Марий-влакын тӱшкан илыме Российысе регионла гыч делегаций ден усталык коллектив-влак толыт.
Кундемлаште теве кунам эртаралтеш:
7 июньышто – Москваште; Виче кундемысе Пижан район Марий Ошай ялыште, Марий Элысе Советский районышто.
12 июньышто – Волжск олаште, Волжский (Карай ялыште), Медведево, Оршанке, Кужэҥер, У Торъял районлаште; Пермь кундемысе Суксун район Кызганде ялыште.
14 июньышто – Параньга (Лаж ял воктене), Звенигово да Шернур районлаште.
«Пеледыш айо» муро фестиваль
14 июньышто – Курыкмарий районысо Троицко-Посадский ял шотан илемын Сиухинский аланыштыже 13-шо гана.
Российын кечыжлан пӧлеклалтше пайрем
12 июньышто – Йошкар-Ола. Тудо «Россий – мыйын шочмо элем» маналтеш.
Семык пайрем
6 июньышто – Морко район Тыгыде Морко ялыште («Семык» регион-влак кокласе кечышот-йӱла фестиваль).
7 июньышто – Одо Республикысе Кизнер район Марий Сарамак ялыште; Пошкырт кундемысе Краснокам район Шушнур селаште.
Окрашудо пайрем
21 июньышто – Одо кундемысе Каракулин район Ныргындыш ялыште. Ир чесноклан пӧлеклалтше йӱла пайрем тыште гына эрта.
Агавайрем кумалтыш
Кажне кундемыште шке палемдат.
28 июньышто – Йошкар-Оласе Пӱнчер отын Тумер аланыштыже регион-влак кӱкшытан Агавайрем кумалтыш.
«Тукымвож йоҥгалтыш» самырык калык усталык коллектив-влакын VII фестивальышт
7 июньышто – Советский посёлко.
«Кугезе мланде» XVI фольклор да этнографий фестиваль
12 июльышто – Килемар районысо «Раздолье» каныме базе.
Сабантуй
14 июньышто – Параньга район Лаж ял воктене;
5 июльышто – Медведево район Руэм посёлко воктенысе ипподром.
Курбан fest
8 июньышто – Йошкар-Оласе рӱдӧ тӱвыра да каныме паркыште. Мусульман-влакын сятой мландыш миен толмо хаджым мучашлымыштлан да Курбан-Байрам пайремыштлан пӧлеклалтеш.
Васюки fect (ончыч «Бендериаде» маналтын)
17-19 июльышто – Козьмодемьянск. Фестивальын лӱмжым жапын йодмыж почеш вашталтеныт. Тыге организатор-влак пайремым у семынрак вияҥдаш шонат.
Марий самырык тукым слёт
7-13 июльышто – Звенигово олаште, Россий кӱкшытан мероприятий тений 17-ше гана эрта. Кажне ийын тудо тӱрлӧ кундемыште лиеш.
Финн-угор йоча да самырык-влакын тӱнямбал слётышт
17-23 июльышто – Йошкар-Ола воктенсе Куяр посёлкысо «Авангард» патриот рӱдерыште.
Самырык казак-влакын сарзе-патриот сборышт
Июнь мучаш-июль тӱҥалтыште (кече рашемдалтеш) – «Чарла хуторышто».
Колумб лудмаш
26 июньышто – Морко район Волаксола ялыште.
«Айдеме чон – кавасе шӱдыр» кугу пайрем концерт
27 июньышто – Морко район Ӱшӱттӱр ялыште. Чолга мер пашаеҥ Юрий Русановым шарнымылан пӧлеклалтеш.
«Марий калыкын легендыже-влак» пу гыч пӱчкедыше-влакын регион-влак кокласе фестивальышт
30 июль-8 августышто – Йошкар-Ола Марий паркыште. Тений кокымшо гана эртышаш.
«Ший кандыра»
Эрвелмарий-влакын регион-влак кокласе калык куштымаш фестивальышт.
23 августышто – Пошкырт кундем Калтаса районышто. Тений тудо 11-ше гана лиеш. Фестиваль конкурс семын эрта. Кажне ийын Российысе регионлаште илыше марий-влакат ушнат.
Светлана Носова ямдылен.
Михаил Скобелевын фотожо
