🥞Тений Ӱярня пайрем 16-23 февральыште палемдалтеш.
Ӱярня пайрем Шорыкйол деч шым арня вара эртаралтеш. Таклан огыл шомакшат кок мут гыч шога – «ӱй» да «арня». Шошо пушан ӱян мелна осо арня мучко ӱстел оза лиеш. Ожно пайремыште телым ужатыме дене пырля чыла осалым, ойгым, ӧпкем луктын кудалтеныт. Ты йӱла таче мартеат аралалт кодын. Вет Ӱярня, телым мучашлен, мотор шошым конден. Поянлык лийже, шурно сайын шочшо манын, Ӱярня кувам ыштеныт. Мотор, ару вургемым чиктен, ял гыч пасугапка деке ужатеныт. Кече шичмеке «Ӱярня каен» манын кычкырен йӱлалтеныт. Тул коймо дене Ӱярня кува осал деч арала манын ӱшаненыт. Ломыжшым шурно пасуш кышкеныт.
Снимкылаште: Ӱмаште Марий паркыште эртыше Ӱярня пайрем.
📸Михаил Скобелевын фотожо/ «Марий Эл» увер агентстве.
