Йошкар-Оласе Таисия Александрова лӱмеш 11-ше №-ан лицейын историй тоштерже ты школын тунемшыже, изак-шоляк Шерстневмытын лӱмыштым нумалеш. Нуно кумытынат Кугу Отечественный сарыште вуйыштым пыштеныт.
Кугуракышт Борис Шерстнев дене пырля ик классыште тунемше-влак Александр Зыков, Николай Новожилов, Александр Ольнев, Виктор Казаринов армийыш пырля каеныт. Нуным действующий армийыш огыл, а Подольскысо пехотный училищыш колтеныт. Курсант-шамыч Москва воктене фашист-влак ваштареш кредалыныт. Кумытын, Шерстнев, Новожилов, Зыков, тусо тале кредалмаште вуйыштым пыштеныт.
– Мыланна вес кундем гычат экспонат-влакым кондат. Москва область гыч поисковик Андрей Рябоконь винтовкым, патроным, снаряд яшлыкым пӧлеклен. Чаманен каласыман, школ тоштерна кугыжанышын огыл, садлан нимогай полыш уке, чылажат школ бюджет полшымо дене ышталтеш, – мане тоштер вуйлатыше Люция Кавиева.
Музейыште Санкт-Петербург оласе Кировский район да Ленинград область гыч ятыр немыч трофей уло. Эсогыл тушечын, тыгак Паша чап ола лӱмым нумалше Подольск ола, Герой-олала Киев, Одесса, Мурманск гыч мландым конденыт.
– Тоштерна эре пойдаралтеш. Ятыр экспонатым Йошкар-Олаште илыше-шамыч пуат. Шуко уверым «Память народа» портал гыч налына. Мутлан, лицейын тунемшыже-шамыч землякна-клакын тойымо верыштым ты порталыште кычалыт.
Мый шкежат шымлымаш пашам серем. Ӱмаште школ нерген книгам возенам. Иктаж 50 экземплярым савыктен лукташ палемденна. Иктыжым Москош, Сеҥымаш тоштерыш, колташ шонымаш уло. Тоштернан «Шерстневцы» кычалше группыжо «Палыдыме салтак» всероссийский конкурсышто 200 тӱжемаш окса сертификатым сеҥен налын. Оксаж дене сенсорный ӱстелым налынна. Тушто видео, фото, кагаз материал-влакым ончаш йӧн уло, тыгак презентацийымат ончыкташ лиеш. Икманаш, йоча-влаклан элнан историйжым у йӧн полшымо дене палдарена, илыш дене тӧр ошкылаш тыршена. Ӱшанем, тоштернан ӱмыржӧ кужу лиеш, – каласыш Люция Габдельнуровна.
Михаил СКОБЕЛЕВ, Лидия ШАБДАРОВА.
Михаил Скобелевын фотожо.
Снимкыште: Люция Кавиева.
