Пашам ыштыше кажне еҥ кеҥежым отпуск дене кылда, очыни. Иктышт кечывалвелыш але йот элыш каналташ миен толыт гын, весышт, ӧрдыж кундемыште илыше-шамычше, ача-ава-влакын суртышкышт. «Мо дене тенийысе кеҥеж тыланда шарнымашеш кодеш, каналтен шуктенда мо?» йодышлан таче вашешташ йодынна.
Эльвира Лисицына, Марий Элын калык артисткыже:
— Мыйын тений кеҥеж отпускем кужу лийын. Тугакшат кажне кеҥежлан иктаж-кушко да вес кундемыш канаш миен толашак тыршем. А тений Юля йолташ ӱдырем дене Калининград областьыш миенна. Светлогорскышто, Балтийскыште, моло олаште лийынна. Калининград областьым тореш-кутынь ончен савырненна манаш лиеш. Кугу корабль-влакым ужынна. Балтик теҥызыште йӱштылынна. Тудо Шем теҥыз гай огыл, йӱштырак. Тӱрлӧ йогын эртымылан кӧра южо вереже леват лийын кертеш. Икымше гана тушто лийме, сандене чылажат оҥай ыле ончен кошташ. Шуко шарнымаш кодын. Йӧн лекме годым кажныжлан путешествийыш миен кошташ темлем.
Альберт Королёв, предприниматель, «ТрансАлб» ООО-н директоржо:
– Каналташ йӧршеш гаяк жап уке. Кеҥеж пашаште эрта. Мыйын грузым шупшыктышо машинам-влак кызыт чоҥалтше Моско ден Тюмень олалам ушышо «Восток» М-12 тӱлыман федерал автомобиль кугорным ыштымаште улыт, сандене Москваш, Нижний Новгородыш, Кировыш, Озаҥыш, моло олашкат кудалышташ логалын. Кужэҥер районысо Коҥганур школым тунем пытарымемлан 35 ий темын, сандене вашлиймашым эртарышна. Иктаҥаш-влак дене вашлияш, рвезе жапым шарналташ куанле ыле.
Радион Плотников, Пошкырт кундемысе марий-влакын «Эрвел марий» автномийыштым, Мишкан районысо тӱвыра пӧлкам вуйлатыше:
– Тений кеҥежымсе отпускем кок арня шуйнен. Тушеч ик арняжым сурт оралтыште изи стройкылан ойыренам. Вес арня мер пашалан каен. 20 муниципал образованийыште шыжым эртышашлык Марий калык погыныш делегат-влакым сайлымаш погынымаш-влак эртеныт. Район администраций вуйлатыше-влакын йодмышт почеш кушко шуынам, мияшак тыршенам. Тиде шарнымашеш кодде огеш керт. Моткоч куандарышт погынымаш-влак, верлаште еҥ-шамыч тушко кумылын ушненыт. А канаш шуктем, эше самырык улам. Теҥызат огеш кошко. Чыла пашам шуктен, куштылго чон дене канаш кок арня отпускем уло.
Галина Шибанаева, Хант-Манси автоном округ, Бобровский посёлкысо школышто йот йылмым туныктышо:
– Кеҥежлан шочмо Марий Элышкем толынам. Канышем моткоч лектышан лийын. Ял пашамат ыштен, шудымат солен шуктенам, Элнет эҥерын яндар вӱдыштыжӧ йӱштылмат, Ежово монастырьысе купельыште чывылалтмат, поҥгым погымат ушеш кодыт. Пырля тунемме йолташ ӱдыр-влак денат вашлийынна. Ӧрдыж кундемлаште илен коштмылан кӧра эре вашлияш йӧнна уке. Шочмо кундемыште лийме кажне татше ушеш кодеш.
Артемий Петров, федерал резервысе «Авиалесоохранын» Юл кундемысе авиотделенийжын десантно-пожарный группыжын инструкторжо:
– Кеҥеж мучко Якутий кундемыште чодыра пожарым йӧртенам. Пӧртылынам веле. Тений тушто чодыра чот йӱлен да кызытат йӱла. Сандене канаш жап йӧршеш лийын огыл.
Светлана Носова ямдылен.
Снимкыште:Йошкар-Оласе пляжыште кеҥежым калык эре шуко лийын.
М.Скобелевын фотожо
