14 августышто Йошкар-Оласе Зарубин уремысе ик кудывечыште «Тазалык пункт» пашам ыштен. «Таза республик» проект почеш илышыш шыҥдаралтше ты мероприятийлан кӧра тиде кечын тазалык шотышто консультацийым 87 еҥ налын кертын.
Кеҥеж мучко Марий Эл вуйлатыше Юрий Зайцевын «Таза республик» проектше полшымылан кӧра Йошкар-Олаште илыше-шамыч диспансеризацийым пӧрт воктеныштак эртен кертыт. Тидын нерген нуно шкештак ойлат.
– Ме пелашем дене телевизорым ончымо годым пошкудо кудывечыш врач-влакын толмышт нерген пален налынна. Мутат уке, тушко миен толаш вашкышна. Тазалыкнам тергышна, вӱрым нальыч, консультацийым пуышт. Ме тиде проектым шонен лукшо да тудым илышыш шыҥдарыше-влаклан кугу таум ойлена, – мане рӱдолаште илыше Анна Васильевна.
Социально кӱлешан проект-влакын координаторышт, «Йошкар-Ола» ола округын Депутат-влак погынын депутатше-влак Дмитрий Лабутин ден Владимир Перерезов «Таза республик» проектын эртарыме акцийлашкыже кумылын ушнат, тушко мийыше калык дене мутланат, волонтёр-медик-шамычлан полшат.
Проектын мероприятийлаже нерген республикысе Тазалык министерствын официальный интернет лаштыкыштыже да соцкыллаште пален налаш лиеш.
