26 апрель – Радиационный аварий ден катастрофылаште вуйым пыштыше-влакым шарныме кече.
Марий Элыште Россий Федерацийын Социальный фондшо гоч 600 утла чернобылец выплатым налеш.
Чернобыльысо аварий айдеме тукымын илыш корныштыжо ик эн шучко техногенный катастрофылан шотлалтеш. Тудым кораҥдаш полшышо еҥ-влак кугыжаныш полышын специальный мерыже-влак дене пайдаланаш праван улыт. Кызыт Марий Элыште 600 утла чернобылец Социальный фонд гоч выплатым налеш: 418 граждан – пенсийым, молыжо – тӱрлӧ соцполышым.
Палемдыме еҥ-влак тыгак пенсийыш жап деч ончыч лектын кертыт. Катастрофын кышажым 1986-1987 ийлаште кораҥдыше пӧръеҥ-влак тиде права дене 50 ийым темымекышт пайдаланен сеҥат, ӱдырамаш-шамыч – 45 ияш лиймекышт. 1988-1990 ийлаште тыршыше-шамыч пенсийыш 55 (пӧръеҥ-влак) да 50 (ӱдырамаш-шамыч) ияш лектын сеҥат.
Чернобылец-влак, моло федеральный льготник-шамыч семынак, тылзе еда тӱлыман выплатым налаш праван улыт. Техногенный кумдыкышто тазалыкым локтылмылан кӧра инвалид лийше да катастрофын кышажым кораҥдыше участник-влак – 3540,76 теҥгем, азапыш логалше-шамыч – 2834,40 теҥгем. Тылеч посна ЧАЭС-ыште аварийым кораҥдыме дене кылдалтше инвалидностян пенсионер-влаклан тылзе еда 1000 теҥге кугытан материальный обеспечений ойыралтеш.
Чернобыль катастрофылан кӧра инвалид лийше военнослужащий ден военнообязанный-шамыч кок пенсийым: инвалидность шотышто да шоҥгылык шотышто страховой пенсийым – налаш праван улыт. Марий Элыште палемдыме кок выплатым налше-влакын пенсий обеспеченийышт кокла шот дене 26209 теҥгеш шуэш.
Радиацийым налше граждан-влак Социальный фондын моло мерыж денат пайдаланен кертыт. Марий Элыште нине еҥ-шамычлан 17 тӱрлӧ выплат ойыралтеш, тыгодым эн шуко йодмаш продовольственный сатулан, инвалид ден пашам ыштен кертдыме граждан-влакын тазалыкыштлан ышталтше зиянлан тылзе еда тӱлыман компенсацийым тӱлымӧ нерген пура.
М.ИВАНОВА
Фотом интернет гыч налме
