Паша дене У Торъял районыш мийымыж годым Марий Эл вуйлатыше Юрий Зайцев специальный военный операцийыште улшо боецын ешыж дене вашлийын.
Боевой действийын участникше-шамычлан полшымылан республик вуйлатыше кугу тӱткышым ойыра да сандене тудо ик салтак лӱмеш командиржын колтымо Тауштыман серышыжым кучыкташ манын нунын дене шкежак вашлийын.
– Часть командир лӱм дене тауштымо мутым ойлаш мылам кок пачаш куанле. Шотан айдемым, пӧръеҥым, пелашым, ачам, элнан патриотшым ончен куштымылан мый тыланда тауштем, – каласен Юрий Зайцев.
А вара серышым лудын пуэн. «Специальный военный операцийыште икымше кечыла гычак тудо шкенжым ӱшанле йолташ семын ончыктен. Тӱрлӧ боевой задачым шуктымо, лӱйкалымаш кайыме годым, неле условийыште, илышыште шкенжым лӱддымын да достойнын куча, саркурал дене моштен пайдалана да вес военнослужащий-влаклан пример улеш. Лачшымак тыгай койыш-шоктышан еҥ-влаклан кӧра Кугу Отечественный сар ийлаште мемнан ветеранна-влак фашист армийым сеҥеныт. А тугеже меат нацизм уэш нӧлталтмым шогалтен кертына!
Тендан землякда кызыт мемнан дене пырля служитла да шке воинский пашаж дене Сеҥымашым лишемдаш полша. Тидлан тыланда кугу таум ойлем. Тидын нерген тудын ешыжым, паша верыштыже коллектившым торжественный обстановкышто палдараш йодам. Тыгак Россий Президент Владимир Владимирович Путинын эн сай военнослужащий — специальный военный операцийын участникше-влак гыч элын кадр резервшым чумырымо нерген решенийжым илышыш пуртымо годым тудлан тӱткышым ойыраш йодам.
Тыланда пиалым, порылыкым да тынысым тыланем!» – возымо серышыште. Тушко бригадын командирже Буйлов шке кидпалыжым пыштен.
Боецын лишыл еҥже-влак Марий Эл вуйлатышылан пӧлеклан, военнослужащий-влакын ешыштлан тӱткышым ойырымыжлан да полышым пуымыжлан тауштеныт.
Марий Эл вуйлатышын администрацийжын информаций паша пӧлкажын уверже негызеш Л.Камалетдинова ямдылен
