МАРИЙ ТӰНЯ

Татарстаныште марий Семык гӱжлен…

Кодшо шуматкечын Татарстанысе марий-влакын Семык пайремышт Агрыз район Пелемеш селаште эртен. Тушко Марий Эл вуйлатыше Юрий Зайцев ден Татарстанын раисше Рустам Минниханов миеныт.

Пайремыште Татарстанын 10 районжо, тыгак Свердловск область, Пошкырт, Одо да Марий Эл республикла гыч уна-влак лийыныт. Торжественный ужаш деч ончыч кок регион вуйлатыше-влак пайрем экспозиций ден кудо-влакым ончал савырненыт. Кажныштыже марий калыкын илыш йӱлаже, вургемже, ыштыш-кучышыжо, кочкышыжо дене палдареныт. Юрий Зайцев Рустам Миннихановлан пайремыш ӱжмыжлан да шокшын вашлиймыжлан тауштен, уна-влакым саламлен да сай кумылым тыланен. Юрий Зайцев Российыште пел миллион наре марий-влакын илымышт нерген ушештарен. Татарстаныште гын тачысе кечылан нунын чотышт 15,5 тӱжемыш шуэш.

 «Марий Эл правительстве  мемнан республикыште илыше национальность-влакын, тыгак марий калыкын йылмыштым, тӱвыраштым, йӱлаштым арален кодаш, нунын коклаште сай кыл да умылымаш лийже манын шуко ышта. Татарстан – тыгак шуко калык илыман регион, туштат нунылан чыла шотыштат вияҥаш  условий ышталтеш», – палемден тудо.

Туштак Юрий Зайцев Татарстаныште марий йылмым туныктымо школ-влаклан  Марий Эл гыч книга-шамычым кондымо нергенат увертарен.

Татарстанын раисше Семыкым руш, татар, одо да чуваш пайрем-влак семынак тӱвыра илышыште шарнымашеш кодшо, волгыдо событий семын палемден. «Ты пайрем калык-влак коклаште келшымаш кылым пеҥгыдемдаш да ваш утларак умылаш полша. Татарстаныште Национальный тӱвыра-влакын идалыкышт эртыме жапланат тудо поснак келшен толеш. Уло кумылын саламлена таче мемнан деке лӱмын толшо да почётан уна-влак радамыш ушнышо Марий Элын вуйлатышыже Юрий Зайцевым!» – каласен Рустам Минниханов. Татарстанын раисше поснак марий калык кочкышым, чиемым да семым палемден.

«Марий-влак моткоч поро кумылан, пашаче улыт, шке йылмыштым, йӱлаштым аралат. Кызыт гына ме калык кочкышым тамлышна. Тендан шке йӱладам арален толмыда мыйым моткоч ӧрыктара. Тиде кугу пагалымашым луктеш. Тендан деч шуко молан тунемаш лиеш, тидлан моткоч кугу тау», – каласен Р.Минниханов.

 Марий Эл вуйлатыше Татарстанын раисшылан марий калыкын ойыртемалтше тӱвыражым арален  да вияҥден шогымаште полшен шогымыжлан  тауштен да  тудым июньышто Йошкар-Олаште эртышашлык Сабантуй пайремыш толаш ӱжын. Татарстанын раисше кумылын келшен.  

Кок регион вуйлатыше-влак пайремыште ойыртемалтше марий-влаклан кугыжаныш наградым, Чап грамот ден Тауштымашан серышым кучыктеныт.

Марий Эл Республикым вуйлатышын администрацийыжын Информаций  пӧлкажын уверже негызеш С.Носова ямдылен

Опубликовать в Одноклассники

Добавить комментарий