Таче Марий кугыжаныш университетыште «Языки. Культуры. Этносы» II Тӱнямбал форум пашам ышташ тӱҥалын. Тудын унаж ден участникше-влакым Марий Эл Кугыжаныш Погынын председательже Михаил Васютин саламлен.
Мемнан эллан этнос, культур, калык манме умылымаш-влак Российын ончыкылыкшо да тыгодымак шукияш историйже дене кылдалтыныт манмым ончыкта, палемден парламентын вуйлатышыже.
«Ме шуко-шуко калыкын культурышт дене чоҥымо самостоятельный цивилизаций улына. Кызыт элыштына 277 йылме дене мутланыше 195 тӱрлӧ калык ила. Нуно чыланат цивилизацийнан йол ӱмбак шогалмашкыже шке йӱлашт, культурышт, йылмышт дене надырым пыштеныт», – манын Михаил Васютин.
Парламентын вуйлатышыже тидымат палемден: историйын неле татлаштыже, шке кугыжанышын эрыкшым арален кодаш манын, Россий Федерацийын калыкше-влак эре иквереш чумыргеныт. Теве тачат нуно кугу элыштына илыше калык-влакын шке йылме дене мутланаш, ожнысо йӱлам шымлаш, кугезе тукымын погымо опытшым кӱсынлаш правашт уке манын шонышо чыла еҥлан тореш вашештат.
Регион ден калык-влак кокласе кылым кумдаҥдаш да пеҥгыдемдаш, калык-шамычын культурыштым пойдараш шонен эртарыме форумын кӱлешлыкшым палемден, Кугыжаныш Погынын председательже организатор ден участник-влаклан шинчымаш да опыт дене пайлалтме, ик пунчалым лукмо пашаште тӱвыргӧ лектышым тыланен.
Форумын кышкарыштыже уна ден участник-влак, тӱнян йылме да культур сӱретшым, ешын рольжым, кусарыме паша ден лингвист шымлымашын теорийыштышт да практикыштышт вашлиялтше пӱсӧ йодышлам тӱрлӧ велым ончен, йыргешке ӱстел йыр мутланат, пайдалын ӱчашат.
Маргарита ИВАНОВА
Марий Эл Кугыжаныш Погынын фотожо
