Моско ВДНХ-ште тӱнямбал кӱкшытан «Россий» ончер-форум петырыме марте 14 кече кодын. Кандаш тылзе утла жапыште Марий Элын 75-ше №-ан павильоныштыжо кундемна дене кугешнаш таратыше да калыкнан тӱвыраж ден йӱлажым почын ончыктышо тӱрлӧ мероприятий эртаралтын.
Кодшо арняште тушко мийыше-влакым Марий Элын ик эн уста артистше ден кидмастарже-влак куандареныт.
М.Шкетан лӱмеш Марий национальный драме, Э.Сапаев лӱмеш опер да балет академический, Марий самырык, Курчак да Курыкмарий драме театр коллектив-влак тӱрлӧ спектакль гыч ужашым модын ончыктеныт, муро-влакым йоҥгалтареныт. Марий Эл правительстве председательын алмаштышыже – тӱвыра, савыктыш да калык-влакын пашашт шотышто министр Константин Иванов палемден:
– Республикнан театрже-влаклан мастарлыкым ончыкташ сай йӧн пуалтын. Чыланат гастроль дене чӱчкыдынак коштыт: ме коллегына-влакын эртарыме фестивальлашкышт лектына, а мемнан деке элнан ятыр олаж гыч толыт, пошкудо регионласе театр коллектив-влакат мемнан дене эреак уна улыт. Театрна-влак дене палдарыме икте-весе коклаште кылым пеҥгыдемдаш да турист-влакым Марий Элыш мияш кумылаҥда. Тидын нерген культур министерствын пресс-службыжо увертарен.
Республикнан рӱдолажын 440 ияш лӱмгечыжлан пӧлеклалтше «Йошкар-Олан ончыкылыкшо» концерт программыште 200 утла артист мастарлыкым ончыктен. «Звукоград», «Жар-птица», «Ассорти», «Улыбка» ансамбль-влак сылне муро да ӧрыктарыше куштымашышт дене кумылым нӧлтеныт, а Чумыр марий кӱслезе йоча ансамбль республикнан моторлыкшым ныжыл сем гоч почын пуэн. «Марий Эл» кугыжаныш куштышо ансамбль ден Э.Сапаев лӱмеш опер да балет академический театрын артистше-влакат ончаш погынышо-влакын шокшо кидсовышыштым суленыт.
«Марий тӱрын моторлыкшо» фестивальыште Морко район Унчо этнокультур комплексын «Акреттӱр» студийжын пашаеҥже-влак Марина Гаврилова ден Галина Архипова марий аралтышым тӱрлаш туныктеныт. А Шернур район Кугу Сердыж ялысе тӱвыра да каныме рӱдерын художественный вуйлатышыже Алевтина Гусева ден Тамшэҥер фольклор пӧртым вуйлатыше Алевтина Волкова тӱрлӧ сӧрастарышым ыштыме, марий тӱрым тӱрлаш туныктымо мастер-классым эртареныт. Кидмастар-шамыч кугезына-влак деч куснен толшо марий тӱрын ойыртемже, моторлыкшо нерген каласкаленыт да шке пашаштымат аклаш луктыныт.
А.БАЙКОВА
Фотом Культур министерствын сайтше гыч налме
