ОБРАЗОВАНИЙ УВЕР ЙОГЫН ШИНЧЫМАШ КУГОРНЫШТО

Тӱвыра-влак кокласе кыл шотышто форум

Марий кугыжаныш университетыште апрель мучаште тӱвыра-влак кокласе вашкыл йодыш дене латнылымше гана всероссийский форум эртен. Тудым Марий Эл Образований да науко министерстве, Андре Мальро лÿмеш 26-шо №-ан гимназий, Марий кугыжаныш университет ямдыленыт. Мероприятий Йошкар-Оласе образовательный организаций-влакын тӱрлӧ площадкылаштышт онлайн да оффлайн йӧн дене эртен.

Тӱҥ номинаций-влак тыгай лийыныт: Поэзий салон (Salon poétique. Belles pages de la poésie), «Франций, Россий, Марий Эл: историй, сымыктыш, йӱла (Monde de multiples cultures) руш да француз йылме дене ямдылыме шанче да усталык проект конкурс, Франкофоний тӱня (Planète De La Francophonie), Шанче факт-влак салон (Atelier scientifique), сӱретсымыктыш таҥасымаш (A l’atelier du peintre).

Форум республикысе школла ден вуз гыч 400 чоло участникым чумырен, тыгак Татарстан Республик, Моско, Угарман, Саратов олала гыч тунемше ден студент-влак ушненыт. Латвич секций пашам ыштен. Доклад да презентаций дене 350 еҥ выступатлен. Лончылымо йодыш-влак Российысе, Францийысе, Марий Элысе сымыктыш, литератур, лингвистике, лингвокультурологий, биологий, медицине, спорт дене кылдалтше йодышлам лончыленыт.

Тыгай мероприятийым эртарыме дене тунемше-влаклан науко аланышке корно почылтеш, адакше кӱшыл шинчымашым пуышо учрежденийлан школлаште профориентаций пашам шукташыже полша.

Форумын программыштыже тыгак руш да йот йылмыла дене возымо произведений негызеш ямдылыме сочинений конкурс, муро фестиваль лийыныт. Сеҥыше ден лауреат-влаклан грамотым кучыктымо.

И.Иванова, филологий науко кандидат, МарГУ-н доцентше,

Ф.Хабибуллина, педагогике науко кандидат, МарГУ-н доцентше

Фотошто: МарГУ-н студентше-влак А.Кудрявцева ден И.Аглиуллина

И.Иванован фотожо

Опубликовать в Одноклассники

Добавить комментарий