Юл кундем федерал округысо «ФормART» стрит-арт фестиваль кумшо гана участник-влакым пога. Тений тушко ушнышо ӱдыр-рвезе-влаклан граффити сӱрет гоч Российысе регион ден калык-влакын тӱвыра поянлыкыштым ончыктыман.
Йодмашым 31 май марте formartpfo.ru сайтыште колтыман. Ойыртемалтше пашан авторжылан шке усталык саскажым шочмо кундемысе тӧнежласе пырдыжыш сӱретлаш йӧным ыштат, шийвундо полышымат кучыктат. Икымше верлан – 200 тӱжем, кокымшылан – 150 тӱжем, кумшылан – 100 тӱжем теҥгем. Ты оксам нуно усталык корныштым вияҥдашлан кучылт кертыт.
О.МОШКИНА
