15 октябрьыште Саранскыште «Финн-угор транзит» калык кокласе сымыктыш да усталык фестивальын гала-концертше лийын.
Пайремыште шке мастарлыкшым шагал огыл уста еҥ да коллектив ончыктен. Финляндий, Эстоний да Венгрий гыч участник-влак калык ончыко онлайн йӧн дене лектыныт.
«Фестивальын кажне номерже финн-угор калык-влакын шкешотан тӱвыраштым почын пуа. Вологодский кружева, кантеле дене шоктымо, кубызын семже, тӱрлӧ йылме дене муро, чыла тиде чонышкына логалын да вес ганат ты вашлиймашыш ушнаш кумылаҥден», – палемден экран гоч «Россий Федерацийын финн-угор тӱвыра рӱдерже» В.Д.Поленов лӱмеш калык усталык пӧртын филиалжын вуйлатышыже Татьяна Барахова.
О.МОШКИНА