Россий мучко школышто тунемше-влаклан тӱвыра да технологий-влаклан пӧлеклалтше «Тӱвыра марафон» просветитель акцийын финалышкыже регистраций почылтын. Тушко ушнаш кумылан-влак 8 декабрь марте Яндексын тематический тестшым эртен кертыт.
Тудыжо кум вариантан: 7-10, 11-14 ияш-влаклан да 15 ияш деч кугурак-шамычлан. Теме рушлаже «Русские классики через призму технологий» маналтеш. Тудын дене кылдалтше йодыш-влаклан вашешташ манын, йоча-шамычлан шинчымаш гына огеш сите, эше логически шонен моштыман.
«Тест черетан контрольныйым ынже ушештаре манын, ме тудым оҥайым, у дене палдарышым ыштенна. «Руш классике тӱня кызытсе технологий деч нимынярат мӱндырнӧ огыл» шонымашым почын пуаш тыршенна», – палемден Яндекс Образованийым вуйлатыше Дарья Козлова.
Ушештарена, ты просветитель акций Российыште 2019 ий гыч эртаралтеш. Тудо школышто тунемше-влаклан ышталтын, но тушко кугыеҥ-шамычат ушнен кертыт. Акцийын тӱҥ шонымашыже – классике искусство ден кызытсе технологий кокласе кылым ончыкташ, тыгак участник-влакым творчески шонаш кумылаҥдаш.
Тенийысе «Тӱвыра марафон» – Яндексын, Россий Федераций Тӱвыра да Просвещений министерстве-влакын пырля ямдылыме проектышт. Тудо 2024 ий 6 июньышто тӱҥалын. Программыш сылнымут, музык, изобразительный искусство дене викториным, мастер-классым да творческий паша-влакым пуртымо. Яндекс сервис икмыняр спецпроектым ямдылен. Мутлан, Яндекс Музыкышто руш композитор-влакын произведенийышт дене плейлист уло, Кинопоиск «Модыш-влак» лончышто руш сылнымут да искусство произведенийла дене викториным муаш лиеш, Яндекс Книги тӱҥалше писатель-влаклан видеолекцийлам темла.
Акцийым тений декабрьыште иктешлат. Участник-влак коклаште призат модылташ тӱҥалеш.
Г.Кожевникова
