Марий Элыште ийготыш шудымо ӱдыр-рвезе-шамыч дене лийше ДТП пытартыш жапыште шукемын, палдарен журналист-влак дене вашлиймаште Марий Элысе МВД-н Госавтоинспекций управленийжым вуйлатыше Ю.С.Есипов.
Юрий Станиславович подростко-влакын корно правилым пудыртымо, шкем корнышто лӱдыкшыдымын кучаш кӱлмӧ нерген каласкален. 16 июньлан ӱдыр-рвезе-шамыч дене кылдалтше 57 ДТП-м палемдыме. Корно туткарыште 16 ияш пассажир колен, ийготыш шудымо 63 самырык еҥ эмганен. Тыгодым пытартыш цифрышкыже велосипед, самокат дене лийше аварият пура. Йошкар-Олаште корно туткарыш ийготыш шудымо-влакын логалмышт 16,7 %-лан кушкын гын, Волжский ден Звенигово районлаште тиде чот 300 % -лан кугемын, а Медведево районышто гын – 450%-лан.
Идалык тӱҥалтыш гыч корным вончышо, йолгороно ден ошкылшо 26 йоча сусырген, а пассажир коклаште тыгайже 30 лийын. Тыгодым индеш ДТП-ште икшыве шкежак титакан гын, машинаште йоча ача-ава дене пырля кудалеш, санденак йочан лӱдыкшыдымылыкшылан мутым лач нунак кучат.
Пытартыш жапыште автотранспортым виктарыше ийготыш шудымо-влакын чотышт кушкеш. Идалык тӱҥалтыш гыч тыгай амаллан кӧра 11 корно туткар лийын. Тушто 13 еҥ эмганен. 2024 ий тӱҥалтыш гыч ДПС пашаеҥ-шамыч машинам виктарыше витле утла 16-17 ияш-влакым корнышто шогалтеныт. Мотоцикл дене кудалыштше йоча-влак аварийыш шым гана логалыныт.
Ийготыш шудымо йоча-влак мопед да мотоцикл дене водительын удостоверенийже деч посна кудалыштыт. Шукыж годым ӱдыр-рвезе-шамычлан тыгай транспортым ача-ава шкеак налын пуа. 16 ийым эртыше подростко закон ончылно шкеак мутым куча. А 16 ийым темен огыл да эшежым водительын удостоверенийже деч посна кудалыштеш гын, мутым ача-ава-шамыч кучат. Тачысе кечын, законодательстве дене келшышын, административный штрафын кугытшо – 30 000 теҥге.
Журналист-влак дене вашлиймаште СИМ (электросамокат, моноколесо), велосипед дене вашлиялтше корно туткар нерген мутланымаш «шокшын» эртен.
– Ме Йошкар-Оласе администрацийыш СИМ, велосипед дене кудалышташ инфраструктурым (лӱмын келыштарыме верым) ышташ кӱлмӧ, СИМ-лаште писылыкым автоматически иземдыме нерген йодмаш дене лектынна. Ончыкыжым тиде йӧн тыгай транспорт дене кылдалтше аварий чотым иземдаш полшышаш. Бульварлаште, набережныйыште, калык-влакын шуко погынымо верлаште СИМ-ла дене шагатыште вич километр деч писынрак кудалышташ чаралтеш. Тыгак Патриарший ден Оболенский-Ноготков площадьлаште электросамокат, моноколесо дене кудалышташ чарыме нерген йодмаш дене рӱдоласе администрацийыш лектынна, – каласен Ю.Есипов.
Госавтоинспекий вуйлатыше журналист-влаклан корнышто йоча-влакын лӱдыкшыдымылыкышт шотышто йодышлан кугу тӱткышым ойырымылан таум ыштен.
Л.ШАБДАРОВА
М.Скобелевын фотожо