ӰДЫРАМАШ КОРНО

Тӱшкаште вий веле огыл, эше – куан

Мом ойлаш, олалаште илыш шолеш. Чонетлан мо келша – тушто чыла гаяк муаш лиеш. Тиде веле огыл, мутлан, кушташ, мураш, иктаж семӱзгарым шокташ, тидым, тудым ышташ тунемнет – кружокым але секцийым верештын да тушко кошташ тӱҥалын кертат.

Яллаште, мутат уке, чылт тыгежак огыл. Но пытартыш жапыште туштат мо кертмым ышташ тыршат. Санденак тӱрлӧ вере тӱрлӧ клубым, ушемым, молым почедат.

Мутлан, Звенигово район Какшамарий ялыште верысе модельный книгагудо пелен «Кидмастар» ӱдырамаш клубым чумыреныт. Тидын нерген ме шукерте огыл ты ялыште эртарыме ик кугу мероприятийыш – Шарнымаш оҥам почмашке – мийымына да, йӧн дене пайдаланен, ты библиотекыш пурен лекмына годым пален нална. Но тушко коштшо ӱдырамаш-влак кокла гыч икмынярышт ты мероприятийын пашашкыже ушненыт, южышт мӧҥгыштышт лийыныт да мемнан дене вашлияш ярсен огытыл. Тиде амал дене «Кидмастар» ӱдырамаш клубым вуйлатышыже Галина Гаврилова дене мутланышна.

– Клубна 2013 ий годсек пашам ышта. Тудым ме Любовь Васильевна Орлова дене пырля чумыренна. Чынрак каласаш гын, тудын тыгай темлымашыже лийын. Вараже клубым мый шкет вуйлаташ тӱҥалынам, – палдарыш Галина Юрьевна.

Тудо ты книгагудышто ынде 20 ий, 2003 ий годсек, ышта. А тымарте Звенигово район Ташнур школышто тыршен: Марий кугыжаныш университетыште налме специальностьшо денак пашам ыштен: марий йылмым да литературым туныктен. Но школым петырымылан кӧра шым ий гыч вес вере каяшыже логалын. Пиалешыже, лач гына ты жапыште Какшамарий книгагудыш пашаеҥ кӱлын да тудым ӱжыныт.

Вараже у пашашке куснымыжо пӱтынь илышыжым вашталтен манашат лиеш. Вет, марлан лекмекше, ончыч ешыж дене Янашплакыште иленыт. А Какшамарийыште ышташ тӱҥалмекше, ӱдырамашын шочмо суртышкыжо, аваж деке, илаш толыныт. Тыгеже чылаштлан сайрак гына лийын докан: Галина Юрьевналан пашашке вес ял гыч шумеш коштын толашышаш уке. А тудо кызыт тушто кидпашалан веле огыл туныкта, эше Какшамарий модельный книгагудым вуйлата. Аважланат куан лийын: ош тӱня дене чеверласымешкыже, кеч икмыняр тылзе шкетын йокрокланен илен огыл.

Клуб нерген умбакыже ойлаш гын, тушко тӱҥ шотышто сулен  налме канышыш лекше да эше пашам ыштыше кугурак ийготан ӱдырамаш-шамыч коштыт. Нуно арняште кунамже ик гана, кунамже кок гана иквереш чумыргат.

– Клубышто мый веле огыл вуйлатыше семын тидым але тудым  туныктем, вате-шамыч шкештат икте-весыштым палдарат. Кӧ мӧҥгыштыжӧ иктаж-мом ыштен онча да мыланна конден ончыкта. Ӱдырамаш-шамычлан келша, тиде моторла, оҥайла чучеш гын, вараже мо кузе ышталтме нерген каласкала. Эсогыл кӧ кӱнчылам шӱдырен огеш мошто гын, тидланат клубыштына туныктат. Южгунамже мый интернетланат эҥертем. Тушто иктаж-мом ойыртемалтшым ужам гын, тудын дене палдарем да вара чылан пырля ыштен шинчылтына. А шукерте огыл мемнан деке эше ик ӱдырамаш ушныш. Тудо  вате-шамычым «лоскутное шитье» йӧн дене палдарыш да ургаш туныктыш, – рашемдыш вуйлатыше.

Тунам, мийымекына, клубын пашажым виктарыше кидмастар-шамычын пашаштым ӱстеллашке шарен оптыш гын, мо гына тушко уке ыле?! Нуным шкеат ужыда (снимкылаште): изи да кугу салфетке, ӱстембалшовыч, шаль, пӱкен шартыш, корзиҥга, носки, пижерге, тапычке, тӱрлӧ сынан прихватке, тӱрлымӧ сӱрет, эсогыл плед!… А вуйлатыше тевыс могай мотор накидкым вачышкыже пыштен?! Тиде – Галина Юрьевнан шкенжын кидпашаже! Пеш сылнын ончалтеш. Адакшым шокшыла коеш.

– Клубна «Кидмастар» маналтеш гынат, ме тидым-тудым ышташ веле огыл тунемына. Тушто тӱрлӧ пайрем але иктаж посна кече, дате  палемдалтме годым тидлан пӧлеклалтше теме дене мутланена, тидын нерген каҥашена. Библиотеке вуйлатыше семын мый иктаж книга дене палдарем. А ялт яра шинчыме деч кидпашам ыштена. Теве 23 февральыште Элым аралышын кечыже палемдалте. Тидын лӱмеш ме эрлашыжым чумыргенна ыле да пӧръеҥ-шамыч нерген мом палена, а мом огына пале – тидын нерген викториным эртарышна. Тыгак, пайрем ӱстелым поген, чылан пырля муралтен шинчышна. «Кидмастар» клубыш тӱҥ шотышто Какшамарий тӱвыра пӧрт пелен чумырымо «Марий шӱшпык» ансамбльын участницыже-влак коштыт, сандене нуно репетицийымат ыштышт. Вет ончылно ынде мемнам, ӱдырамаш-влакым, 8 Март пайремна вуча, да тудлан кызытак ямдылалташ тӱҥалыныт.

Тыгак клубыштына кажныжын шочмо кечыжым палемдена, пайрем озам саламлена.

Кызыт чыла вере – кажне кундемыште, илемыште – специальный военный операцийыште улшо-влаклан мо кертме дене полшаш тыршат да посылкым чумырен колтат. Какшамарий ял шотан илемыштат поро кумылым ончыктымо акцийым эртареныт да тушко еҥ-шамыч шагалын огыл ушненыт.

«Кидмастар» клубыш коштшо ӱдырамаш-шамычат ӧрдыжеш кодын огытыл. Нуно икмынярын шокшо меж носким пидын колтеныт. Сандене тидлан таум ойлымо шуэш.

Икманаш, яллаштат еҥ-шамыч шке илышыштым кузе моштат да кузе кертыт, туге оҥайракым, пайдалым ышташ тыршат. Чынакыс, йокрокланен шинчен, мо сайже? А иквереш чумыргет, ваш-ваш мутым вашталтет – тидыжак мом шога?! А кунам эше иктаж-мо улан тунемат – утларак пайдале! Арам огыл ойлат: «Тӱшкаште – вий». Да такшым вий веле огыл, эше – куан!

Любовь Камалетдинова

Авторын фотожо

Опубликовать в Одноклассники

Добавить комментарий