Ме, Советский посёлкысо 5-ше №-ан «Ромашка» йочасадыштына вуйлатыше гыч тӱҥалын 4-7 ияш йоча-влак марте, икманаш, чыланат специальный военный операцийыште улшо салтакна-влаклан кертмына семын полшаш тыршена.
У ий вашеш нунылан серышым возен, саламлымашан открыткым ямдылен колтенна. Тыгак калай ате-шамычым погенна да нуным районысо тоштерыш окоплык сортам ышташ пуэнна.
Чыла тидын деч посна нашлемниклан материал гыч ластык-шамычым пӱчкеденна да шкенан районысо Вечын школыш колтенна. Тушто кугурак ийготан йоча-влак нашлемникым пидыт.
Мемнан йочасадын музыкальный руководительже Ирина Целищеван ачаже, 1935 ийыште шочшо Евгений Константинович Кукушкинат поро пашашкына ушнен: ластык-шамычым мӧҥгыштыжӧ пӱчкеда. «Тек мыйынат изи полышем кугу сеҥымашым лишемда. Тек тыныс илыш лиеш. Мый вет Кугу Отечественный сарын йочаже улам. Сар пуламыр жапыште могай илыш – сайын палем», – ойла тудо.
Светлана Шабалина,
Советский посёлкысо 5-ше №-ан «Ромашка» йочасадыште марий йылмым туныктышо.
Авторын фотожо.
