Корно озанлык
Тӱшкан каҥашен да аклен
Нацпроектым илышыш пуртымашке граждан-влакат чулымын ушнат. Эртыше идалыкыште мер пашаеҥ-влак дене 25 гана верлашке лекме. Объектлаште лийме деч посна Юл кундем кугыжаныш технологий университетыште да Автокорно техникумышто лекцийым эртарыме.
Ик эн кужун вучымо вашлиймаш семын Йошкар-Оласе Шумелёв уремыште тусо илыше-влак дене корным олмыктымо шумлык погынымашым ончыкташ лиеш. Тунам корнышто кужу жап вӱд шинчен – тидлан верчынак тудо лакылаҥ локтылалтын. Специалист-влак калык ойлымым шотыш налыныт да экшыкым кораҥдышашлан ешартыш йӧным кычалыныт. Олмыктымо деч вара вуйшиймаш лийын огыл. Тылеч посна тиде корно моло урем дене кудалыштмашым луштарен.
Але теве Одывлак – Кужэҥер – Параньга автомобиль корнын 5-ше гыч 9-ше километр кокласе ужашыжым торжественно почмашке Кужэҥер ден Параньга районлаште илыше-влак толыныт да тудын чапле улмыжым шке шинчашт дене ужыныт.
Вургемыште тул дене волгалтше настам кучылтмын пайдалыкшым почын ончыктышо #ВОЛГАЛТ акций эртен. Ты пашашке капкыл да усталык дене вияҥме Multiskill рӱдер гыч ӱдыр-рвезе да Автокорно техникум гыч студент-влак ушненыт.
«Корнышто кудалыштме лӱдыкшыдымылык» регионал проект почеш кугу паша шукталтеш. Эртыше ийын «Лӱдыкшыдымылык лабораторий» мобильный комплекс полшымо дене республикысе районла гыч кок тӱжем утла тунемше корнышто лӱдыкшӧ деч посна кудалыштме правилым тунеммашым эртен. Йомакысе Светофор Светофорович «Изи йолешкын академийже» проектым йочасадлаште умбакыже шуктен толеш.
Юрий ИСАКОВ
«Марийскавтодор» ГКУ деч налме фото
