Шукерте огыл республикысе Татар тӱвыра рӱдерыште регион ден наций-влак кӱкшытан «Мирас — Наследие» усталык конкурс эртен.
Вигак палемдыман, конкурсын Гран-прижым Медведево районысо Пӱкшерме фольклор пӧртын «Весела кумыл» фольклор ансамбльжын участникше-влак сеҥен налыныт.
Конкурсын татарла да рушла йоҥгалтше вуймутышкыжо марлажымат ешараш уто огыл, очыни, – «Югыпого». А молан ешараш шонымаш лекте: таҥасымашке шуко марий коллектив ушнен. Чумыржо 300 наре участник. Нунын коклаште Марий Эл дене пырля Татарстан, Чуваший, Угарман гыч татар, руш, марий, чуваш, одо артист-влак лийыныт. 94 усталык коллектив ден артист усталыкшым, тӱрлӧ калыкын койышыжым мурымаште, куштымаште , семӱзгар дене шоктымаште ончыктен. Тыгак фольклор композиций-влакым ужаш лийын. Жюри радамыште искусствоведений доктор, сулло хореограф, тӱвыра пашаеҥ, тыгак композитор, тӱнямбал конкурс-влакын лауретышт лийыныт.
Ойыртемалтше-влакым палемдыме тат моткоч куанлын эртен. Марий коллектив-влак коклаште республикысе Марий тӱвыра рӱдерын пашаеҥже Эльвира Петрован вуйлатыме «Падыраш» ден «Мурпеледыш» ансамбльже-влак «Семӱзгар дене шоктымаш» да «Вокал» номинацийлаште икымше вер дене палемдалтыныт.
Снимкыште: Гран-прим сеҥен налше «Весела кумыл».
Фотом Татар тӱвыра рӱдерын лаштыкше гыч налме.
