11 августышто Калык тӱвыра пӧртыштӧ «Евразийын йӱкшӧ» музыкальный проектын мастер-классше эртен.
Мероприятийыште «Евразийын йӱкшӧ» неоэтнокреативный проектын кумшо сезонжын финалистше-шамыч лийыныт. Тушто артистын шкем кучен моштымыжо, тудын имиджше, концертлам эртарыше, продюсер-шамыч дене пашам ыштыме, бизнес-планирований, конкурс ден фестивальлаште участвоватлыме, аудиторий дене кылым ыштыме нерген эксперт, MUSECUBE.RU портал ден КАЛЬЯН ФМ радиом вуйлатыше, неоэтнокреативный проектын продвижений шотышто наставникше Владимир Кальян каласкален.
А 10 августышто кастене «Евразийын йӱкшӧ» проектын финалистше-шамыч Йошкар-Олан лӱмгечыжлан пӧлеклалтше мероприятийыште усталыкыштым сценыште ончыктеныт.
Патриарший площадьыш ончаш погынышо калыкым Красноярск край гыч AYAA, Пермь кундем гыч Балакирь, Москва гыч «Коленкоръ» группо, Якутий гыч Гарпани Солинга, Калмыкий гыч HAGRIN да Марий Эл гыч ШЫП ЛИЙ проект куандареныт.
«Евразийын йӱкшӧ» музыкальный проектын очный этапше 5 августышо тӱҥалын. Йошкар-Олаште эртыше мерприятийла деч вара музыкант-шамыч пашаштым умбакыже шуят, студийыште альбомым возат. А 17 августышто финалист-влак Москваште «Музеон» паркыште усталыкыштым ончыктат.
«Евразийын йӱкшӧ» неоэтнокреативный проектым Межэтнический журналист гильдий Тӱвыра инициативе-влак президент фонд полшымо дене эртара. Ты проект «современный этнике» жанрыште мурышо-влаклан тӱрлӧ могырым вияҥаш, кушкаш полша.
Л.ШАБДАРОВА
Фотом Э.Куклинан соцкыл лаштыкше гыч налме
