Марий тиште кечын М.Шкетан театрын марий сынан ик пӧлемыштыже чумыргышо туныктышо-влакын каҥашышкышт, чынрак каласаш гын, Марий туныктыш институтын увертарыме Этнокультурный содержаниян электрон образовательный ресурс (ЭОР) конкурсым иктешлымашке да сеҥыше-влакым наградитлымашке, логальым. Нуным пайрем дене Марий Эл образований да науко министрын алмаштышыже Валентина Гаврилова саламлен.
Шочмо йылмым вияҥдымаште, арален кодымаште кугу вий – туныктышо-влак. Нуно, тӱрлӧ йӧным кучылтын, йоча-влакым марий йылмым тунемаш кумылаҥдат. У Торъял район Тошто Торъял кыдалаш школын туныктышыжо-влак Надежда Романова ден Снежана Соколова марий йылме дене сайтым ыштеныт, тыге марий йылме (шочмо) да литератур ОЭР дене сеҥышыш лектыныт. Кугыжаныш марий йылме дене Морко 2-шо №-ан школын туныктышыжо Надежда Голубкина («Палет мо шочмо йылмым?» модыш) ден Медведево районысо Знаменский школын туныктышыжо Ольга Шешукова («Интерактивный метод-влак») 1-ше да 2-шо вер дене палемдалтыныт. Оршанке кыдалаш школын туныктышыжо Светлана Таныгина ИКН уроклан «Пӱртӱсым аралет – тугеже шочмо элым аралет» проектше дене шке номинацийыштыже сеҥыше лийын. Кумшо вер дене Морко район Октябрьский школын ИКН дене туныктышыжо Борис Борисов «Краеведческая пятёрка» проектше дене 2-шо верым налын.
– Нине паша-влак институтнан сайтыштыже вераҥдалтыт, тек моло туныктышо-влакат пайдалланен кертышт, – иктешлыме годым каласышт Марий туныктыш институтын научно-шымлыше паша шотышто проректоржо Надежда Гусева ден марий филологий да культорологий кафедрым вуйлатыше Елизавета Игнатьева.
