KravtGroup Российысе унагудо оператор да девелпер Йошкар-Олаште кызытсе жаплан келшыше 120 номеран бизнес-отельым нӧлташ тӱҥалеш. Тидын нерген Марий Эл вуйлатышын администрацийжын увер пӧлкаже увертарен.
Kravt Yoshkar Ola отельым марий рӱдола покшеке вераҥдат. Тудо ик эн палыме объектыш да турист-влакын чыла кумылыштым шуктен кертше условиян кӱкшӧ качестван унагудыш савырнышаш. Проект регион вуйлатыше Юрий Зайцевын темлымыж почеш Сбербанкын полшымыж дене илышыш шыҥдаралтшаш. Ты пашалан палемдыме инвестиций кугыт 1,2 миллиард теҥгеш шуэш. Объектым 2024 ийын нылымше кварталыштыже почшаш улыт.
Ончылгоч палемдыме почеш, архитектуржо олан сынжылан келшен толшаш. Регион вуйлатышын ойлымыж гыч объект олан у историйжылан да тыгак йот элла гыч толшо турист-шамычланат келшышаш. Тудын сервисшат рӱдоланам у кӱкшытыш нӧлталаш полшышаш, бизнес сообществылан тӱрлӧ мероприятийым эртараш йӧным почшаш. А тыгай площадкыже-влак 250 еҥ пурыман лийыт.
Сбербанкын Марий Элысе пӧлкажым вуйлатыше Арсений Колобовын ӱшандарымыже почеш, Сбербанк ты кугу пашан чыла этапыштыже полшаш тӱҥалеш.
Ты унагудо 4 шӱдыран лиеш. Тушто бар, ресторан, конференц-зал вераҥыт. Шкенжын виктарыше компанийже лийшаш. KravtGroup-лан негызым пыштыше Валерий Кравцунын палемдымыж почеш, у отель ешартыш паша верым ышта, олан унагудо сервисшым Российысе да йот элласе кумдан палыме сетьла кӱкшытыш нӧлталеш.
Каласен кодыман, кодшо идалык мучаште марий рӱдолаште тыгак жаплан келшыше эше кок у унагудым пашаш колтеныт. Юриныштат уна-влакым вераҥдыме эко-парк шӱлышан унагудо почылтын. Лишыл жапыште тушто «Граф» лӱман унагудым нӧлташ тӱҥалшаш улыт.
Сай ошкыл семын ««ВÿдЛэнд» инвестиционный проектым ончыктыман. Марий Эл правительстве ден «Корпорация. Туризм. РФ» АО ойпидышым ыштеныт. Тудын кышкарыште ты проект илышыш шыҥдаралташ тӱҥалеш. 500 миллион теҥгеаш проект «Марий чодра» национальный парк кумдыкым авалта. Шонымаш 2027 ий марте илышыш пурен шушаш.
С.Носова
