Марий Элым вуйлатыше Юрий Зайцев ден Росмолодёжьын вуйлатышыже Григорий Гуров вашлийыныт. Нуно республикыштына молодёжь политикым вияҥдыме корно дене кылдалтше йодышым каҥашеныт.
Вашлиймаш Москваште, Россий кӱкшытан «Самырык-влаклан регион» конкурсын очный этапыштыже, лийын. Марий Эл деч йодмашым пуымо презентаций годым регионым вуйлатыше палемден: тӱҥ задаче – самырык-влаклан моштымашыштым вияҥдаш сай йӧным ышташ да нунын коклаште республикна гыч ӧрдыж кундемыш кайыше-влакын чотыштым шагалемдаш.
«Молодёжь – мемнан кызытсе да ончыкылык. Марий Элыште 165 тӱжем самырык еҥ ила. Нунылан республикыштына у рӱдер-влакым почына, талантан-шамычым грант да премий дене палемдена, образований ден спортым вияҥдена», – каласен Юрий Зайцев.
Марий Элын Молодёжь политике комитетын председательже Станислав Игошин палемден: молодёжь политикын тӱҥ направленийже-влак инфраструктурым вияҥдыме дене кылдалтыныт: самырык-шамычлан кажне районышто кызытсе жаплан келшыше рӱдерым почмаш, молодёжь дене пашам ыштыме шотышто специалист-влакым туныктымаш, ӱдыр-рвезе-шамычым социальный могырым кӱлешан проектлаш ушымаш.
«Самырык-влаклан регион» конкурсыш ушнаш пытартыш кум ийыште Марий Элыште 317 миллион теҥгем ойырымо, молодёжь политике инфраструктурым уэмден вияҥдыме, 120 тӱжем утла еҥым авалтыше 50 утла у мероприятийым эртарыме.
Конкурс комиссийын еҥже-влак Марий Элын презентацийжым кӱкшын акленыт. Иктешлымаш тений июньышто лиеш. Сеҥыше-влаклан проектым илышыш пурташ окса федерал бюджет гыч ойыралтеш.
Марий Элым вуйлатышын пресс-службыжын уверже негызеш Галина Кожевникова ямдылен
Денис Речкинын фотожо
