Эртыше кугарнян республикыште «Марий Элын идалыкын туныктышыжо-2022», «Марий Элын идалыкын воспитательже-2022» да «Марий йылмым эн сайын туныктышо-2022» профессионал мастарлык конкурслаште сеҥыше-влакым торжественно саламленыт. Мероприятий Яков Эшпай лӱмеш Марий кугыжаныш филармонийыште эртен.
Палемдыме усталык таҥасымаш-влакын республик кӱкшытан этапше тений 18 апрельыште тӱҥалын. 22 апрель марте участник-шамыч туныктымо да воспитанийым пуымо мастарлыкыштым ончыктеныт. Конкурс площадке-влак тиде гана Медведевысе гимназийыште, тыгак Оршанке районысо Кугунур, Медведевысе 4-ше №-ан школлаште эртеныт. Туныктышо ден воспитатель-влак ойырымо темышт дене мастер-классым, занятийым эртареныт, образовательный проектышт дене палдареныт, «йыргешке ӱстел» йыр тачысе кечылан ик эн пӱсӧ йодышлам каҥашеныт.
Ты гана лауреат радамыш теве кӧмыт лектыныт. «Марий Элын идалыкын туныктышыжо-2022» конкурсышто: Е.Ермолина (Шернурысо 1-ше №-ан школышто тӱҥалтыш классым туныктышо), Т.Жидко (Волжск оласе 4-ше №-ан школышто географийым туныктышо), Т.Золотарёва (Советский районысо Ургаш лицей-интернатыште тӱҥалтыш классым да англичан йылмым туныктышо). «Марий Элын идалыкын воспитательже-2022» конкурсышто: С.Боронина (Козьмодемьянск оласе 2-шо №-ан «Золотая рыбка» йочасад), М.Куклина (Советский посёлкысо 3-шо №-ан «Теремок» йочасад), Н.Петухова (Оршанкысе «Родничок» йочасад). «Марий йылмым эн сайын туныктышыжо-2022» конкурсышто: Р.Богомолова (Советский посёлкысо 3-шо №-ан школ), Л.Сергеева (Волжский районысо Карай школ), И.Михайлова (Шернур районысо Кукнур школ).
Жюрин (председательын пашажым Марий образований институтын ректоржо Л.Овчинникова шуктен) увертарымыж почеш, чыла конкурсантынат ойырымо тематикышт тачысе кечылан келшыше лийын, чыланат анализым да иктешлымашым ыштен моштымышт дене ойыртемалтыныт, туныктымо пашаште инноваций йӧным пайдалын кучылтыт да эн тӱҥжӧ – пашаштым да йоча-влакым моткоч йӧратат.
Торжественный мероприятийыште лауреат-влакым ПГТУ-н проректоржо А.Волков, МОСИ-н ректоржо И.Загайнов, образований пашаеҥ-влакын общероссийский профсоюз организацийыштын регионысо организацийжын председательже Л.Пуртова, «ВТБ» банкын регионысо отделенийжын еҥже А.Ожиганов да молат саламленыт, шарнымашан пӧлекым кучыктеныт. Конкурсышто сеҥыше-влакым Марий образований институтын ректоржо Л.Овчинникова ден республикын образований да науко министрже Л.Ревуцкая увертареныт. Нунын лӱмышт:
«Марий Элын идалыкын туныктышыжо-2022» — Татьяна Жидко, Волжскысо 4-ше №-ан школышто географийым туныктышо;
«Марий йылмым эн сайын туныктышо-2022» — Роза Богомолова, Советский посёлкысо 3-шо №-ан школышто марий йылмым (кугыжаныш) ден ИКН-ым туныктышо;
«Марий Элын Идалыкын воспитательже-2022» — Наталья Петухова (Оршанкысе «Родничок» йочасадын воспитательже).
Ончыкыжым нуно Марий Элын чапшым Россий кӱкшытыштӧ аралаш тӱҥалыт.
Г.Кожевникова
Снимкыште: шола гыч пурлашке – сеҥыше-влак Р.Богомолова, Т.Жидко да Н.Петухова.
М.Скобелевын фотожо
