Шернур район Лажъял Тӱвыра пӧрт верысе калыклан моткочак кӱлешан, молан манаш гын тушто «Ший оҥгыр» йочасад верланен.
Дошкольный тӧнеж тымарте тошто пу зданийыште улмаш, а тудыжо йоча-влакын илышыштлан лӱдыкшӧ лийын, сандене Тӱвыра пӧртым йочасадыш савыраш логалын. Туге гынат тудын оралтыжым уэмдаш кӱлын. Капитально олмыкташ 2024 ийыште Марий Эл правительствын резерв фондшо гыч 24,2 миллион теҥгем ойырымо, муниципальный бюджет гыч – 5,2 миллион теҥгем.
Паша ышталтын, кызыт оралте тачысе жапын йодмашыже-влакым шукта. Икымше пачашыште пищеблок, прачечный, пашаеҥ-влак пӧлем да заведующийын кабинетше верланеныт гын, кокымшышто – йоча-шамычлан пӧлем-шамыч, методкабинет да музыкально-спортивный зал. Йочасадыш 3-7 ияш 35 икшыве коштеш.
Шернур районыш паша дене мийымыж годым Марий Элым вуйлатыше Юрий Зайцев тиде дошкольный тӧнежым ончен лектын, воспитатель да ача-ава-влак дене мутланен. «Пырля йоча-влаклан у садикым ыштенна. Тӱҥжӧ – нунылан, воспитатель да ача-ава-влаклан келша», – палемден тудо.
2025 ийыште Марий Элыште «Еш» национальный проект кышкарыште кок тыгай тӧнежым капитально олмыкташ палемдыме. Тиде Марий Турек районысо Косолоп селасе «Ромашка» ден Волжск оласе 3-шо №-ан «Орлёнок» йочасад-влак.
Палемдыман, капитально олмыктымо дене кылдалтше федеральный программыш йоча-сад-влакым Марий Эл икымше гана пуртен. Тыгай йӧным Россий Федераций президент Владимир Путинын тӱҥалтышыж почеш илышыш пурталтше у национальный проект ыштен.
Марий Эл Республикым вуйлатышын пресс-службыжын уверже негызеш Г.Кожевникова ямдылен.