Советский район Ленин лӱмеш колхоз уржа-сорла тургымыш ушнен.
Марий Элыште шурным погымо тургым вийым налеш. Тудын тенийысе ойыртемже тыгай: кужу жап вӱдыжгӧ, мардежан да кӱдырчан йӱран игече шогымылан кӧра шурно шуко вере лап возын. Сандене тудым кашташке солен оптен кошташ кӱлеш, вара веле шийман. Тыге 30 июльлан республикыште 4,5 тӱжем гектар шурным солымо, тышечын 2,9 тӱжем гектаржым шийын налме.
Ме Советский район Ленин лӱмеш колхозышто лийна. Озанлык вуйлатыше Михаил Лисовын мутшо почеш, шурнывечыш икымше кечын 29 июльышто лектыныт.
– Тӱҥалтыш кечын комбайным кокияш уржа пасушко луктын ончышна, – каласкала Михаил Ильич. – Тиде пашам уста комбайнерна Игорь Капитоновлан ӱшанышна. Пален нална: шурно эше сайын шуын огыл, ужаргырак, изишак вучалташна перна. Гектар еда 35 центнер дене лектын. А теве таче кокияш шыдаҥ нурышко погаш куснышна. Ӱмбач онченак палаш лиеш: ты гана парча шолдыра, пырчыжат туто, папан. Шыдаҥын качествыж верч тыршена, кормалан йӧршӧ визымше классаным огыл, киндым, мелнам кӱэшташ келшыше кумшо классаным поген налшаш улына. Шурно пасуна тений 1,2 тӱжем гектарым айла. Кодшо ийын чумыржо 3,2 тӱжем тонн пырчым шийынна гын, тений ныл тӱжемыш шуктынена.
Тений озанлык шошо агам районышто эн ончыч эртарен колтен да кубокым сеҥен налын. Мланде паша колхозыш ялозанлык науко кандидат Виталий Бердниковын тӱҥ агрономлан толмыж деч варат воранен каен.
– Тӱҥ агрономна чыла пасу пашам наукын кӱштымыж почеш шукташ тырша, ӱяҥдышым, кушкылым аралыме средствам налаш, моло роскотлан ныл миллионат пеле теҥгем кучылтна. Ынде лектышыжат уло. Эше кодшо ийысе ужалышаш 150 тонн шыдаҥна уло. Акше гына кызытеш келшыше огыл, эсогыл шке акшымат ок суло. Кызыт килограммже латкок теҥге марте волен каен.
Ме шурным погымо пасушто лийна. Мийымына годым Игорь Капитонов АCROS 550 комбайнже гыч Николай Лебедевын виктарыме ГАЗ-53 машинашкыже пырчым ястара ыле.
– Мый ынде икымше ий веле огыл комбайным виктарем, – ойла самырык комбайнер. – Техникым жапыштыже ачален ямдыленна ыле. Шурно кушкын шумеке, юватылде нурыш лекна. Пырче тений чаплын шочын, пашам ышташ кумыл уло. Теве шокшо кочкышым кондышаш улыт.
Шийме пырчым Кужмарий селасе идымвечыш наҥгаят. Тудым эрыктен-коштен аралаш пыштат. Икманаш, у тургым удан огыл тӱҥалын. Механизатор-влакын мутышт почеш, игече гына келшыше лийже ыле, а нуно мом шуктышашым сайын палат да тыгак ыштат.
Снимкыште: комбайнер Игорь Капитонов – пасушто.
Вячеслав Смоленцевын фотожо.
