Марий Элыште Россий кӱкшытан «Профессионал-влак» чемпионат толкынын регионысо йыжыҥже тӱҥалын.
Россий Федераций президент Владимир Путин задачым шынден: 2030 ийлан экономикын йодмашыжым шотыш налын, специалист-влакым ямдылыме шотышто пайдале системым ышташ. Тидым шукташ элна мучко «Молодёжь да йоча-влак» нацпроектын «Профессионалитет» федеральный проектше илышыш пурталтеш. Тудын кышкарыштыже ӱмаште «Профессионал-влак» да кӱкшӧ технологий-влак чемпионатлаш паша верым пуышо 7,6 тӱжем утла организаций ден предприятийым ушымо.
Россий Федераций правительстве председательын алмаштышыже Дмитрий Чернышенко каласен: «Профессионал-влак» толкынын мероприятийлашкыже 2025 ийыште 1,13 миллион еҥ ушнен. Тышеч 28 тӱжем утла участникше сеҥыше ден призёр радамыш лектын, нуно элнан ончыл предприятийлаштыже стажировкым эрташ але пашаш пураш темлымашым налыныт».
Чемпионатын регионысо йыжыҥже 28 февраль марте шуйна. Таҥасымаш колледж ден техникум-влакын мастерскойыштышт веле огыл, тыгак предприятийлаште эрта.
Сеҥыше-влак эртыше ийласе семынак шке кундемын чапшым регион-влак кокласе йыжыныште да финалыште аралаш тӱҥалыт.
Г.Кожевникова
Марий Эл Образований да науко министерствын соцкылысе лаштыкше гыч налме
