Россий Федерацийын сулло журналистше, Марий Элын калык писательже, курыкмарлий серызе Ипполит Лобановын «Эх, мужыр кӧгӧрчен…» у сборникше савыкталтын.
Книгам «Марий Эл» газет» ООО лукташ полшен: компьютер вёрсткым да книга комым Е.Чемекова сӧрастарен, корректор пашам Н.Васильева ден Е.Вараксина шуктеныт. Санденак автор у сылнымут саскажын презентацийжым редакцийыште эртарыш. Парням пыштен шотлаш гын, И.Лобановын тиде 12-шо сборникше, тышке «Серызе», «Чын мут тӱрлызӧ» да «Озым» повесть-влак да лу ойлымаш пурталтыныт. Олыкмарлашке журналист йолташыже-влак Евгений Садовин (тудак книган редакторжо) ден Борис Шамиев кусареныт. Россий писатель ушемын членже Эрик Петровын ончылмут семын кучылтмо интервьюж гыч лудшо еҥ Курыкмарий кундемын патриот эргыжын илыш корныжым шергалеш; тудын марий сылнымутнам вияҥдыме, туан йылмым аралыме, ял илышым саемдыме верч чон йӱлымыжым пален налеш.
– Чыла произведениемын сюжетше илыш гыч налме да сылнымут йӧн дене сӧрастарыме улыт, возымо годым вӱд гае кая, – чонжым почо у книган озаже. Ойлымашыже-влак тӱҥ шотышто яндар йӧратымашым, вате-марий кокласе келшымашым моктат, илышыште вашлиялтше уда койышым шылталат.
Презентаций годым И.Лобанов кусарыше-влаклан, курыкмарла возымаште полшен шогышо Е.Егоркиналан, Л.Ягодаровалан да молыланат таум ойлыш. Гармоньым шокталтымыж почеш лекше сылне сем Печать пӧртым иландарыш, шонена. Каласен кодена: писательын 13-шо книгажат ямде, тудым «Эх, …» манын лӱмдаш шона – кызытеш огына ойло, илена да ужына.
Л.СЕМЕНОВА
А.Байкован фотожо
