ГАЛЕРЕЙ

Сылне тӱсан да тӱрлӧ койышан шошо

Сылне тӱсан да тӱрлӧ койышан шошо

Тенийысе шошо игече пытартыш кечылаште пешыже огеш куандаре гынат, пеледыш-влак садак сылнын пеледыт, пуйто кумылнам нӧлталашак тыршат. Такшым, май йӱштӧ да мардежан – шурно сай лектышан лиеш манын ойлат.

Шошо юалгырак гынат, садак шкенжыным налеш. Теве ломбо, вишне, грушо пеледалтыныт, пуйто сӱан вургемым чиен шогалыныт. Ломбо пеледышыжын пушыжак мом шога, туге? Вондерлаште шӱшпык, пасушто турий нимучашдыме сӧрал мурыштым йоҥгалтарат. Но содыки шошын тӱсшӧ – пеледыш. Садлаште примул, тюльпан-влак моторешт шогалыныт, а чодыраште – кӱдыроҥгыр. Примул шотышто ойлаш гын, тудым калык «шошым почшо сравоч» манеш. Тӱткынрак ончал – вет тудо чынжымак сравочым ушештара.

Ялысе калыкым ты пагыт, мутат уке, пашаш луктеш. Теве У Торъял посёлкышто илыше, Ошкаҥер ялыште суртым кучышо Князевмыт моло деч почеш кодаш огыл манын, пареҥгым шындаш лектыныт.

– Тиде – мемнан фазенде, – шыргыжальыч сулен н    алме канышыште улшо Неонина Викторовна ден Иван Николаевич.

Ты кечын ме У Торъял кундемысе Немда эҥер воктене верланыше кол озанлыкын ерыштыже ятыр ир комбым, ола тӱсан лудым ужынна. Тидын шотышто палемдынемак ыле. Каваште чоҥештен кайыше кайыккомбо каштам ужалтын гын, тений нунын ерыш канаш волен шичмыштымат ужаш пиал шыргыжале. Мый дечем шекланенрак, кужу йӱкым луктыч да южыш писын нӧлталтыч, вара, ик йырым ыштен, вӱд ӱмбаке шинчыч. Теве кушто кайыкын вийже! Мыйже нунын каныме да кочмо татыштым изишак лугыч ыштышым шол…  Но «юмын комбо-влакым» тыге лишычын тымарте ужын омыл ыле! Туге гынат Кужэҥер могырыш чоҥештыше кумло утла турням эскеренам. Ушешем 2014 ийыште ужмо тыгаяк тӱшка возо. Тунам ош комбо-влак Ошла эҥер воктенысе ужар пасуш волен шинчыныт ыле, но нунылан «сонарзе-влак» ласкалыкым ышт пу – лӱдыктен колтышт. Айдемын ир койышыжо кунам йомеш гын? Тидын деч вара кайыккомбо-шамыч ты верыш шичмымат чарненыт…

Теве мемнан шошо могай тӱрлӧ ужашан, койышан да тӱсан. Кеч-мо гынат тудо – пӱртӱсын ик эн сылне пагытше: волгыдо да ончыкылыклан ӱшаным шочыктышо.

М.СКОБЕЛЕВ

Авторын фотожо.

 

Опубликовать в Одноклассники

Добавить комментарий