Кодшо кечылаште чот лумшо лумым Йошкар-Олаште кызытат эрыктат.
Февральын икымше арняштыже, pogodaiklimat.ru ресурсын палдарымыж почеш, Йошкар-Олаште тылзаш нормо гыч 58 %-ше лумын. Тылеч вара сутка еда рӱдоласе корныла гыч 5000 куб утла лумым эрыктен шупшыктат. Тидлан «Город» муниципал предприятий сутка мучко пашам ышта. Ты пашам 80 наре тӱрлӧ технике шукта.
У йӧн темлалтеш
Марий Элыште илыше-влак ЖКХ кугыжаныш увер системе (Государственная информационная система ЖКХ) дене пайдаланен кертыт.
Тиде – жапын йодмашыжлан келшыше да йӧнан ресурс. Тудын полшымыж дене ТСЖ, виктарыше (управляющий) да ресурсоснабжающий манме организаций, тӱрлӧ кӱкшытан кучем орган-влак дене кылым ышташ, лекше йодышым рашемдаш, уверым пален налаш лиеш.
Ты сервисыш тыгай ссылке дене пурыман: https://clck.ru/T2jvU. Тыгодым ешартыш регистрацийым эртыман огыл.
Палдарыме семын ойлаш гын, тиде йӧн дене кызыт Марий Элыште илыше 20 тӱжем утла еҥ пайдалана.
