Икмыняр жап ончыч У Торъял район Кузнеч ялыште илыше, «Весела кова-влак» фольклор ансамбльын чолга участницыже, йоҥгалтарыме мурышт-шамычын авторжо Александра Григорьевна Ермакован кочкыш рецептше-влакым кум номер почела савыктышна. А вара, эре ик озаватын темлымыжым гына палдараш огыл манын, изишак каналташ сӧренна ыле.
Тевыс, тылзе наррак жап эртымеке, уэш тудын декак пӧртылна. Чынрак каласаш гын, ончыгече У Торъял районыш командировкыш мийышнат, Александра Григорьевна деке унала пурен лекна. Адакшым тудо кодшо ганак мылам кок когыльо рецептшым каласкален ыле. Да тунамак мутланен келшенна: У Торъял районыш мийыме годым пурен, когыльым тамлен ончена. Сандене толшашна вашеш ӱдыржӧ дене пырля нуным кӱэштынат шуктеныт ыле да мемнам, ӱстел тич тӱрлӧ чесым поген, шунен-шунен пукшышт. Александра Григорьевна эсогыл уна мурымат муралтыш! Теве кузе вашлийыч! А чеверласыме годым йокмалан мом гына пыштен ышт колто?! Татьяна эсогыл пидме катам пӧлеклыш!
А когыльыжо могай тамле улыт?! Нунын кузе ышталтмыштым пален налыда гын, ялт ӧрыда! Чыным ойлаш гын, когыльылан руашым тыге ышташ лийме нерген але марте ик ганат колын да тудым, мутат уке, нигунамат кочкын ончен омыл ыле.
Таче иктыжын рецептшым темлена. Тиде –
Пешкыде шем кинде дене ыштыме когыльо
Лӱмжак ойыртемалтшын йоҥга, туге? «Кузе тыге: пешкыде шем кинде гыч когыльо?» – вигак йодыш лектеш. Палдарена.
Озавате тыге каласкалаш тӱҥале:
«Руашлан теве мо кӱлеш:
- ик сукыр шем кинде,
- пел литр тувыртышвӱд,
- пел кило ош ложаш,
- пел изи совла шинчал.
Кӧргылан кӱлеш:
- 2 кило кеч-могай шыл. Лудо шыл гын, путырак тамле лиеш,
- 2-3 шоган,
- пел стакан «Полтавский» шӱраш,
- кӱлмӧ семын шинчал.
Тыге ямдылем:
- ик сукыр шем киндым тувыртышвӱдеш лозыртем. Тудым мый падыштен пыштем;
- тушко шинчалым ешарем, лугем да пел шагат наре шинчыктем;
- ынде тушко ош ложашым пыштем да кидыш пижмым чарнымешкыже нӧштылам;
- кастенак шылым пӱчкеден да шинчалтен шындем;
- эрдене, шоганым падыштен пыштен, тудым тушитлаш шындем;
- шӱрашым мушкам, шокшо вӱдыштӧ изишак кучем, ястарем, вара шылышке ешарем да эше пел шагат наре тул ӱмбалне кучем, йӱкшыктарем;
- ынде когыльо комым ыштем. Тидлан руашым салмашке але противеньыш шарем, кӧргашым пыштем, ӱмбачше вес ужаш руаш дене леведам, ваш ушем да кӱаш коҥгашке але духовкыш шындем.
Ик сукыр пеҥгыде шем кинде гыч 8 изирак але кокла кугытан 4 когыльо лектеш.
Перкан лийже!»
Любовь Камалетдинова
Авторын фотожо
