УВЕР ЙОГЫН

«Сурт-печын» коҥга ончылныжо — Татьяна Степанова

Таче тыланда шке рецептшым Татьяна Степанова (снимкыште) палдара. Тиде чолга да чулым ӱдырамашым шукынжо палат. А теве мом кочкаш шолташ йӧратымыжым шагалынже палат. Тидым шотыш налынак, таче тудым «Сурт-печын коҥга ончыкыжо» ӱжынна. Содыки 8 Мартлан пӧлеклалтше кужу каныш кечыла ончылно вучат. А тыге гын, южышт пӱртӱсышкӧ лектын але кудывечыштыштак «шашлык-кол шӱр» сезоным почыт. Тыгай годым тиде рецептна поснак лачеш толеш!

Кол шӱр

«Таче ме кол шӱрым шолташ тӱҥалына. Мый денем мӧҥгыштӧ уна лиймыж годым кӧ тудым кочкын гын, чыланат эше кочкаш кумылан улмышт нерген ойленыт. Шукыштлан келша, – каласкалаш тӱҥале Татьяна Николаевна. – Кеч такше тушко мый, мутлан, нимогай шӱрашымат ом пыште.  

Кӱлеш:

  • 1 сомын вуйжо,
  • 8 пареҥге,
  • 3,5-4 л вӱд,
  • 1-2 лавр лышташ,
  • 3 шоган,
  • 1 кешыр,
  • 1 изи совла паприке,
  • 1 укроп вуй (зонтик) але тыгыдемдыме ужар шудыжо,
  • кӱлмӧ семын шинчал.

 

Тыге ямдылыман:

  • каструльыш вӱдым темена да кол вуйым изирак тулыш шолаш шындена;
  • шолаш пурымекше, колын шинчаже ошеммеке, лемым вес каструльыш шӱрена да уэш тул ӱмбаке шындена;
  • пареҥгым эрыктена, нылыте пӱчкын пыштена;
  • шоганым эрыктена да пелыгыж але тыгак нылыте шелын ешарена;
  • укроп вуйым пыштен шолтена, вара луктына але тыгыдемдыме ужар шудыжым ешарена;
  • чевер тӱслан 1 кешырым нӱжен пыштена;
  • паприкым, лавр лвшташым ешарена;
  • вуйым эрыктена, папшым ойырен налына, шӱрыш пыштена да вич минут наре шолтена.

Кол шӱр ямде! Перкан лийже!»

 

Темлыме семын ешарыш:

– Кол вуй изи логалын гын, мый коктым пыштем. Тыгак, шӱр чот вишкыде ынже лий манын, ик «Сардина» але «Скумбрия» консервым ешарем. Нугыдемдаш полшымо дене пырля тудо шӱрлан эшеат тамле тамым пурташ полша. 

Рецептым темлымыж деч вара Татьяна Николаевна палемдыш:

– Кочкыш шотышто мый кычалтылше омыл. Да шкемынжат кочкаш шолтымо шотышто кугу мастарлыкем, дар манмем уке. Кугу усталык пуалтын огыл.

Южышт шылан кочкышым чот йӧратат. Тудым кочде ик кечымат огыт чыте. А мый гын шӱман пареҥге деч посна иленат ом керт дыр. Тудым моткочак йӧратем! Шинчалтыме ковышта, тыглай ковышта, поҥго – теве эше мо мыйын кочкышем улыт.   

Любовь Камалетдинова

Опубликовать в Одноклассники

Добавить комментарий