82 ий ончыч 22 июньышто Россий калыкын илышыже пуйто пелыгыч катлен. Кугу Отечественный сар 27 миллион еҥын илышыжым наҥгаен, да мландымбалне тыныслыкым аралыше герой-влакым шарныме лӱмеш ий еда Шарнымаш сортам чӱктена.
Тыгаяк лӱман акций Российыште 2004 ий гыч илышыш пурен. Шарнымаш кече водын мемориал ден сарзе чап верлаште тӱжем дене еҥ погына да вуйым пыштыше герой-влакым шарныме лӱмеш сортам чӱкта.
2020 ий гыч акций онлайн-форматыште эрташ тӱҥалын. Мероприятийыш иктаж амаллан кӧра миен кертдыме еҥ-влак виртуальный сортам кызытак деньпамяти.рф. сайтыште «чӱктен» кертыт.
Молодёжный политике комитетын палдарымыж почеш, «Шарнымаш сорта» всероссийский общенациональный акций Марий Элнан рӱдолаштыже йӱла почеш Сарзе Чап монумент воктене эрта. Мероприятий 21 июньышто 20 шагатат 20 минутышто тӱҥалеш. Тушто республикым вуйлатыше да мер пашаеҥ-влак дене пырля тыглай калыкат участвоватлен кертеш. Сортам вераҥден, «Шарнена» («Помним») мутым возаш, Тыныслык кӧгӧрченын оратажым сӱретлаш палемдыме.
«Шарнымаш сорта» акцийыш ий еда тӱжем утла еҥ ушна. Тений тиде чот эшеат кугемеш манме ӱшан уло.
М.ИВАНОВА
