15-19 июньышто «Пӱнчер» тунемме да тренировкым эртарыме базыште школлаште тунемше-влаклан республик кӱкшытан кок слёт эртаралтын: икымшыже – самырык турист-влакын, кокымшыжо – краевед-шамычын.
Тушто Йошкар-Ола, Волжск олала, тыгак Кужэнер, Шернур, Звенигово, Советский, Медведево, Морко, Параньга, Килемар, Оршанке районла гыч 12-16 ияш ӱдыр-рвезе-влак – чылаже 160 еҥ – погыненыт. 20 командылан Марий Элын «Роза ветров» йоча да самырык-влаклан рӱдерже оҥай программым ямдылен. Участник-шамыч спорт ориентирований, ошкылмо да велодистанцийыште спорт туризм дене вийыштым тергеныт, краеведений конференцийыште лийыныт, шочмо школышт дене палдареныт, усталык конкурслаште да квиз-модышышто моштымашым ончыктеныт.
Каласыман, тыгай мероприятийын тӱҥ шонымашыже – йоча-влакым спорт туризмлан, шымлыме пашалан, таза илыш-йӱлалан кумылаҥдаш да шочмо кундем нерген шукырак шинчымашым пуаш.
Кеҥежымсе туризм слётышто общий зачётышто тыгай команде-влак сеҥеныт:
1 вер — Шернурысо Йоча усталык полатын;
2 вер – Йошкар-Оласе «Азимут» рӱдер;
3 вер – Параньгасе Йоча усталык рӱдер.
Самырык краевед-влакын слётыштыт сеҥеныт:
1 вер – Звенигово оласе 11-ше №-ан школ;
2 вер – Советский районысо Роҥго школ;
3 вер – Шернур районысо Марисола школ.
Г.Кожевникова
Фотом Марий Эл Образований да науко министерсвын сайтше гыч налме