Марий Элым вуйлатыше Александр Евстифеев экспресс-тестым налаш эше 5 млн. теҥгем ойырен.
Таче регионым вуйлатыше А.Евстифеев у коронавирус инфекцийлан тестирований дене утларак еҥым авалтыме йодыш дене совещанийым эртарен. Тыгодым тудо Россий президент Владимир Путинын регион-влак ончылан тестированийым икмыняр пачаш кугемдаш да ковидан еҥ-влакым посна ойыраш задачым шындымыжым ушештарен.
«Эртыше арнян тиде пашам саемдаш полшышо экономический пунчалым лукна. Кандаш миллион теҥгем тестированийлан ешартыш оборудованийым да вич миллион теҥгем экспресс-тестлан кучылтмо материалым налаш ойырышна. Тыге, 28 октябрьыште республикын Тазалыкым аралыме министерствыжлан 13 миллион теҥгем колтышна, но тиде экономический пунчал лийын. Таче показательым саемдаш да йодмо кӱкшытыш шуаш медицинский пунчал кӱлеш», – совещаний тӱҥалтыште манын А.Евстифеев.
Роспотребнадзорын Марий Элысе виктемжым вуйлатыше Светлана Булатован мутшо почеш, таче ПЦР-тестированийым кум лабораторийыште: Эпидемий рӱдерыште, 1-ше №-ан медсанчастьыште да СПИД-рӱдерыште – ыштат.
«Теҥгечысе кече марте республикыштына сутка еда 1410 шымлымашым эртарыме. Тиде 100 тӱжем еҥлан шотлымаште 208 тестированийым ыштыме нерген ойла. Теҥгечак у амплификаторым шындыме, тудын полшымыж дене таче эрлан шымлыме чотым кугемдыме. Ынде 100 тӱжем еҥлан шотлымаште 237 шымлымашым эртарена», – увертарен С.Булатова.
Экспресс-тестирований лабораторий-влаклан нагрузкым огеш ыште, но тудо утларак еҥым тергаш йӧным ышта да айдемын коронавирус дене инфицироватлалтмыжым тӱҥалтыш йыжыҥыштак рашемден кертмыж дене шергакан.
Тазалыкым аралыме министр Марина Панькован мутшо почеш, у коронавирус инфекций дене черланен кертше утларак еҥым шымлыме шот дене налме пробовыделенийын автоматический системыжым СПИД-рӱдерыш кондымо.
«Тиде оборудований дене 11 ноябрь гыч пашам ышташ тӱҥалына да шымлымашым 930 гыч 1470 марте кугемдена. Тымарте ойырымо вич миллион теҥге дене экспресс-диагностикылан тестым налаш контрактым ыштенна. Тестым 10-11 ноябрьыште вучена, тудо 5-10 декабрь йотке ситышаш», – ешарен М.Панькова.
Марий Элым вуйлатыше финанс министр Алексей Торощинлан Тазалыкым аралыме министерствылан ИХА тестым налаш эше 5 млн. теҥгем ойыраш кӱштен.
«31 декабрь марте ситыже манын, экспресс-тестым эше налаш кӱлеш. Тылеч посна лабораторий службым модернизироватлыме кышкарыште федеральный средства кӱшеш налме уэмдыме кок оборудованийым декабрьыште кондаш палемдыме, да вара нунат пашам ышташ тӱҥалшаш улыт. Гарантий уке, а калыкым тестироватлыме паша лугыч лийшаш огыл. Сандене тестым эше вич миллион теҥгелан налына да эшеат шуко экспресс-диагностикым эртараш тӱҥалына», – палемден А.Евстифеев.
Тестированийым кугемдыме да ковид дене инфицироватлалтше еҥым жапыштыже посна ойырымо йӧн коронавирусын шарлымыжым чарен шогалташ, черланыме шырымым иземдаш да тазалыкым аралыме системын пашажым куштылемдаш полшышаш, совещаний мучаште эше ик гана ушештарен регионым вуйлатыше.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
