Шуко уым, оҥайым ужын, теҥыз мучко…
«Козьмодемьянскыште верланыше «Паллада» парус клуб мӱндыр поход гыч пӧртылын. Моряк-шамыч «Святой Косма» тунемме парусник дене 20 кечыште 1260 километр кужытым эртеныт.
Козьмодемьянск – Косма» маршрутым эртымышт годым Макарьево, Нижний Новгород, Городец, Кинешма, Плёс, Кострома, Чкаловск олалашке пуреныт. Такшым тыгай путешествий «Школа под парусами «Марий Эл» проектын «Сила спорта» программыж дене келшышын эрта. Чылажат пайдалын эртен. Эн ончыч парусникын йоча экипажше икте-весым умылаш, икой дене илаш тунемын, шуко оҥайым ужын.
Мутлан, Костромаште палладовец-влак самырык моряк-шамычын всероссийский слётыштышт участвоватленыт. Но ты походын эн тӱҥ шонымашыжлан теве мо шотлалтын: тунемме парусникыште йоча теҥыз клуб-влак дене палыме лияш, тунемме парусникыште практикым эртен, опытым погаш. Поход жапыште «Святой Косма» судно ал парус йымалнысе туныктымо школ семын лийын. Тудым элыштына улшо 20 утла йоча теҥыз клуб-шамыч онченыт. Таче кечылан ты судно дене Марий Элысе дене пырля моло регионла гыч самырык моряк-влаклан посна путешествийыш лекташ йӧным ышташ шонат. Тӱрлӧ проектым илышыш шыҥдарашак тыршат. Кызыт у экипажым погат да военно-морской флот кечым палемдаш ямдылалтыт. Чыла проектым шотыш налын, тунемме фильмым ямдылаш да методический пособийым савыктен лукташ шонат.
Е.Эшкинина.
