Кугыжаныш Погынын председательже Михаил Васютин Курыкмарий районысо Пайскырык да Эмӓн селалаште лийын.
24 августышто Пайскырык селаште у спорт площадкым торжественно почыныт.
Пайрем Россий Федераций Кугыжаныш тистын кечыж вашеш «Под флагом России – к спорту и добрым делам!» девиз дене эртен да верысе калыкым, спортсмен, спортын ветеранже ден почётан уна-шамычым иквереш чумырен.
Площадкым «Российын спортшо» кугыжаныш программын полшымыж дене чоҥымо. Тидлан 3 миллион утла теҥгем кучылтмо: финансированийын тӱҥ ужашыжым республикын бюджетше гыч ойырымо, негызым ямдылыме паша верысе бюджет кӱшеш шукталтын. Специалист-шамыч футбол капка, баскетбол да волейбол стойко, кусаркалаш лийме трибуно-влакым шынденыт, резинке пудырго гыч ямдылыме ик тичмаш шартышым пыштеныт, площадкым савар дене авырен налыныт.
Тений Пайскырык кундемыште ял шотан кумдыкым вияҥдыме программын полшымыж дене паркым тӱзатыме, а Марий Элым вуйлатыше Юрий Зайцевын тӱҥалтышыж почеш да Спорт министерствын тыршымыж дене у площадкым чоҥымо. Тылеч посна «У школ» национальный проектын кышкарыштыже Пайскырык кыдалаш школым модернизироватлаш тӱҥалме. Икманаш, ик ият пеле жапыште Пайскырык исторический селан рӱдерже тӱрыснек у сыным налын.
Марий парламентын спикерже у спорт площадкым торжественно почмо жапын Россий Кугыжаныш тистын кечыж дене келшен толмыжым палемден. Элнан кум тӱсан тистыже-влак сарзына-шамычын сеҥен налме у кумдыклаштат нӧлталтыт.
«Ме йӧратыме курыкмарий кундемыштына эше ик сылне верым чоҥена да Шочмо элнан куатше нерген шарналтена. Тек тиде площадкыште йоча-влакын воштылмо йӱкышт йоҥгалтеш, тек нуно шуко рекордым шындат да шке селашт дене кугешнат. Пеҥгыде тазалыкым, поро тӱҥалтышыште сеҥымашым да сай кумылым!» – тыланен Михаил Васютин.
У площадкыште икымше таҥасымаш мини-футбол дене йолташле матч лийын. Тыгак йоча ден кугыеҥ-шамычлан конкурс ден эстафете-влак эртаралтыныт.
***
Тиде кечынак республикын законым ямдылен лукшо да пеҥгыдемдыше органжым вуйлатыше Михаил Васютин Эмӓн кыдалаш школыш пурен.
Тыште 1 сентябрьыште парт коклашке 134 ӱдыр-рвезе шинчеш. Михаил Васютин класс-влакым, актовый залым, кочмыверым ончен да нунын у тунемме ийлан мынярак ямде улмыштым аклен. Парламентын спикерже посна тӱткышым школ воктенысе кумдыкым тӱзатымылан да лӱдыкшыдымылык йодмаш-влакым шуктымылан ойырен, тыгак образовательный организацийым вуйлатыше-шамыч дене лишыл жапыштак решатлаш кӱлшӧ йодышлам лончылен.
Михаил Васютинлан поснак школ тоштер келшен. Тудым 2024 ий ноябрьыште «Прожектор» креативный лабораторийын кышкарыштыже тӱвыра волонтёр-шамыч ден Т.Евсеев лӱмеш калыкле тоштерын пырля ямдылыме проектышт да «Икымше-влакын толкынышт» грант полыш дене почмо.
Кугыжаныш Погынын председательже школын илыш корныжлан, тудын кумдан чапланыше да специальный военный операцийыште патырлыкым ончыктышо выпускникше-шамычлан пӧлеклалтше экспозиций-влак дене палыме лийын. Тыгай тоштер йоча-шамычым шочмо элым йӧратыме шӱлышеш куштымаште, тукым кылым кучымаште кугу верым налеш, палемден тудо.
Михаил Васютин Эмӓн школ директорын пашажым шуктышо Елена Старикова ден йӱлышӧ чонан педагог-влаклан тунемме заведенийын историйжым арален кодаш тыршымылан, школым у тунемме ийлан сайын ямдылен шуктымылан мокталтен да коллективлан сай стартым, у кӱкшытым, оҥай да поян школ илышым тыланен.
Маргарита ИВАНОВА.
Марий Эл Кугыжаныш Погынын пресс-службыжын фотожо.
