22-23 майыште республикысе общеобразовательный организацийлаште «Пытартыш йыҥгыр» пайрем-влак эртат. Нунын кокла гыч иктыштыже – Медведево район Новый посёлкысо У Арбан кыдалаш школышто – меат лийна да пуйто ик татлан угыч эртыше пагытыш, школышто тунемме жапыш, пӧртылна…
Теве нуно, тений 9-ше да 11-ше классым тунем пытарыше-влак, икте почеш весе торжественный линейкыш ошкыл эртышт… Ӱдыр-влакын шем школ формышт ӱмбачын чийыме ош фартукышт лумла волгалтеш, тыгаяк ош лум гаяк эрге-шамычын тувырыштат. Но эн волгыдыжо шинчашт – йӱлышӧ, ала-мо у лийшашым шижше, ончыко ончышо. Тыгодым шӱм-чоныштышт мо ышталтеш – шкешт гына каласен кертыт…
Школ директор Марина Валентиновна Козыреван мутшо почеш, 2022-2023 ийлаште чылаже 367 ӱдыр-рвезе шинчымашым поген. Тений 9-ше классым чылаже 24 еҥ тунем пытара, а 11-шым – 9.
– Пытартыш ийлаште тиде чот эре тыгайракак лийын, но тӱҥалтыш класслаш шукырак икшыве толаш тӱҥалын. Индешымше классым тунем пытарыше-влак тӱҥ шотышто Йошкар-Оласе аграрный, технологический колледжлаш тунемаш каят. Латикымше класс деч вара умбакыже шинчымашым республикысе вузлаште налыт, тыгак моло вереат тунемыт, мутлан, Рязань да вес олалаште, – каласыш директор.
«Выпускник-влаклан пытартыш йыҥгырым йоҥгалтарыме татыште Тендам могай шижмаш авалта?» йодышемлан Марина Валентиновна тыге вашештыш:
– Тиде торжественный линейкым ынде латкудымшо ий эртарем да латкудымшо ий ты кечын эр годсекак чонем йӱла…
Торжественный линейке деч ончыч 11-ше классым тунем пытарыше-влакын класс вуйлатышышт, историйым, ИКН-ым да обществознанийым туныктышо Александр Вячеславович Ельмекеев дене мутым вашталташ йӧн лекте. Тудыжын шӱм-чонжо тунемшыже-влак деч чотрак вургыжын манам гын, йоҥылыш ом лий, шонем, вет тиде классше тудын – икымше да ӱмырешлан эн шерге кодеш.
– Кокымшо ий гына класс вуйлатыше лийынам гынат, мый шкемым эн пиалан туныктышо улам манам. Тунемше-влак эреак полшаш ямде лийыныт. Кеч-могай пашам пуэныт гынат, нуно ӱшанле полыш кидем гай чучыныт. Нунын дене пашам ышташ – кугу пиал. Санденак мылам нунын деч ойырлаш моткоч шӱлыкан. Но вес могырым ончалаш гын, кажныже илышын кугорнышкыжо икымше ошкылым ышта. Кызыт икымше верыште – тазалык. Мый нунылан эн ончычак пеҥгыде тазалыкым тыланем. Тек волгыдо корным муын моштат, тек кугу Юмо пиалым пуа! – каласыш Александр Вячеславович.
Туныктышын мутшо почеш, индеш ӱдыр-рвезе гыч иктыже отличий дене школым пытара, кудытын ударник улыт.
Тыгаяк поро, шӱм гыч лекше тыланымаш-влакым выпускник-шамычлан школ директор, икымше туныктышышт, ача-ава-шамыч ойленыт. Мероприятийыште Медведево район администрацийын еҥже-влакат поро шомакым ышт чамане да тиде веле огыл – тунемме верым вуйлатыше Валентина Козыревалан «Россий Федерацийысе воспитанийын да просвещенийын почётан пашаеҥже» знакым кучыктышт. Выпускник-влакын «Пытартыш йыҥгыр» мурышт да куштымашышт деч вара кужун вучымо да тыгодымак вучыдымо тат лишеме – пытартыш йыҥгыр йоҥгалте. Тудым 11-ше классым отличий дене тунем пытарыше Камиля Галяутдиновалан йоҥгалтараш ӱшанышт.
Мыланнаже тыге каласаш гына кодеш: корныда пиалан лийже, ӱдыр-рвезе-влак! У Арбан школым тунем пытарыше-шамычлан веле огыл, республикысе чыла выпускниклан кумда илыш корнышто эреак пеҥгыдын ошкылаш тыланена!
Г.Кожевникова
М.Скобелевын фотожо
