Марий Эл вуйлатыше Юрий Зайцев да «Т Плюс» компанийын генеральный директоржо Александр Вилесов теплоэнергетикын мультимедийный рӱдерыштыже лийыныт, шыже-теле жаплан ямдылалтме йодышым да коммунал инфраструктурым уэмдыме шотышто паша планым каҥашеныт.
Палемденыт, 2023 ийыште «Т Плюс» шокшым пуышо инфраструктурым вияҥдаш 240 миллион теҥгем ойыра, тидыже кодшо ий дене таҥастарымаште ик кумшо ужашлан шукырак. Окса пуч-влакым вашталташ, 2-шо ТЭЦ-ым уэмдаш кучылталтеш. Тылеч посна, компаний «Марбиофарм» котельный деч шокшым налше 11 илыме пӧртым централизованный системыш ушаш, оборудованийым капитально олмыкташ тӱҥалеш.
«Марий Эл столицыште шокшым пуышо инфраструктуро 60 процентлан телылан ямде», – каласен Александр Вилесов.
Мультимедийный рӱдерыште шокшым пуымо, ТЭЦ ден тепловой сеть-влакын пашаштым шке шинча дене ужаш лиеш.
«Ме энергоресурс дене пайдаланена, пӧртнам ырыктыше шокшо эре тыгак лийшаш манын шонена, тидын годым ушышкат огына нал, технологий дене кылдалтше могай неле, сложный пашам еҥ-влак ыштат, а нуно мемнан коклаштак илат, пашашт пеш кӱлешан улмым умылен, уло кумылын сайын шуктат», – выставкым ончышыжла каласен Юрий Зайцев.
«Т Плюс» ПАО-н мультимедийный рӱдерже – тиде интерактивный тоштер, тушто кызытсе жаплан келшыше тепловой электростанцийын пашажым, шокшо вӱд кушеч толмым ужаш, шкендым инженер семын терген ончаш лиеш. Рӱдер Йошкар-Оласе Ий полат воктене верланен да ончаш толшо-влакым 25 июль марте вуча.
Марий Эл Республикым вуйлатышын администрацийжын информаций паша пӧлкажын уверже негызеш Л.СЕМЕНОВА ямдылен
Д.РЕЧКИНЫН фотожо
