Шернур район Шокшем ялыште Владимир Кораблёвын пӧртшӧ поснак келшыш, сандене оза-влак дене палыме лияш кумыл лекте.
Пӧръеҥ тыштак шочын-кушкын. Варажым шӱжарже дене пырля Йӱдвел кундемыш, Воркута олаш каен. Тушто шахтыште пашам ышташ тунемын, туштак ончыкылык пелашыже дене палыме лийын.
– Владимир Степанович дене Воркуташте палыме лийынна да ешым чумыренна, ынде пырля 34 ий илена. Кок йочам ончен-куштенна. Иктыже – военнослужащий, тудо Севастопольышто ила, а весыже Йӱдвел кундемыштак кодын. Мый шкеже Липецк ола гыч улам. Изиэм годым ача-авам дене пырля Воркуташ илаш кусненна, – каласыш суртозан пелашыже Оксана Викторовна.
Владимир Степанович шахтыште 25 ий пашам ыштен, а пелашыже 33 ий МЧС сферын пашаеҥже лийын. Кызыт коктынат сулен налме канышыште улыт.
– Тиде – Володян шочмо-кушмо верже, – умбакыже ойла озавате. – Ачаже Степан Павлович ден аваже Нина Фёдоровна ӱмыр мучко тыште иленыт. Степан Павлович Кугу Отечественный сарыште кредалын, вара сӧреман мландым нӧлтымаште тыршен. Тудын лӱмжым ял воктенысе стеллыште серыме. Марий Элыш ме кажне ийын отпуск жаплан толына ыле. Шокшем ял мылам моткочак келша. Йӱдвелыште вет телым пеш йӱштӧ, мардежан. Тушто пушеҥгыжат шагал. Санденак тышке илаш куснаш тореш лийын омыл, ынде 2021 ий гыч тиде ялыште илена. Вийвалне улмо годым пӧртым чоҥенна.
Мутланен-мутланен, пакчашке лекна. Вигак шинчалан лопка оҥа дене авырыман кӱкшӧ йыраҥ-шамыч пернышт, йырым-йыр пушеҥге тӱҥ гыч пӱчкедыме тыршыш-влакым вераҥдыме, а нунын коклаште – тыгыде шаргӱ.
Владимир Степанович техникылан шӱман, тудо шкак кум ораван мотоциклым поген. А Оксана Викторовна радынам тӱрлаш мастар.
М.СКОБЕЛЕВ.
Авторын фотожо.
