Йошкар-Оласе школаште тунемше-влаклан марий национальный кочкышым пукшаш тӱҥалыт. Тудым менюш пуртымо шотышто темлымашым Марий Элым вуйлатыше Юрий Зайцев сайлан шотлен.
А икымше тыгай кочкыш подкогыльо лиеш, тудо республикын национальный брендшылан шотлалтеш.
Тыгай темлымаш Россий Федераций правительствын 2023 ий 29 мартысе пунчалжын йодмашыжлан келшен толеш, тушто тыге палемдыме: «Россий Федерацийысе субъект-влакын кӱшыл исполнительный органже-шамычлан тӱҥалтыш, тӱҥ да кыдалаш общий образований программыла дене тунемше йоча-влаклан кочкышым социально-демографический факторым, тыгак национальный конфессий да верысе ойыртемым шотыш налын ямдылаш да пукшаш йӧным ыштышаш».
Марий Элна национальный кочкышыж дене шукертак чапланен. А подкогыльо шотышто ойлаш гын, тудыжым йоча-шамыч веле огыл, кугыеҥ-влакат йӧратен кочкыт, сандене школ менюш темлыме. Но ончыкыжым эркын дене менюш марий калыкын моло кочкышыжымат пурташ палемдыме.
Марий Эл Республикым вуйлатышын администрацийжын информаций паша пӧлкажын уверже негызеш Г.Кожевникова ямдылен.
