Марий Эл образований да науко министр Лариса Ревуцкая Параньга районысо Алашайка ден Матародо ял шотан илемлаште лийын. Тудо ача-ава-влакын кумдаҥдыме погынымашышкышт миен. Нуныжо «Школ образований системым уэмден вияҥдымаш» программым илышыш пуртымо йодыш дене кылдалтыныт.
Ача-ава-влакын погынымашыштым Параньга муниципальный район администрацийым вуйлатыше Альфит Ибраев эртарен. Калык дене вашлиймаште тыгак Бауман лицейын генеральный директоржо Григорий Пейсахович, верысе районым вуйлатыше Л.Михеева да молат лийыныт.
Образований да науко министр палемден: школ инфраструктурым вияҥдыме программе жап йодмо семын да сайын илышыш пурталтшаш, тунемше да нунын ача-аваштын ӱшаныштым шуктышаш.
Параньга муниципальный район администрацийым вуйлатышын мутшо почеш, 2022 ий апрель гыч август марте Мераҥсола ден Матародо школлам капитально олмыкташ палемдыме. Ойырымо средства дене тунемме вер-влаклан мебельым да столовыйлан оборудованийым налыт. Чыла тидым ышташ кок школлан 96 миллион теҥге кучылталтеш. Альфит Ибраев тыгак палемден: школлам капитально олмыктымо да инфраструктурым вияҥдыме шотышто ача-ава-влакын обшественный контрольышт шотышто штабым чумырымын кӱлешлыкшым палемден. Тудын пашаже эскераш веле огыл, тыгак программым илышыш пурташ кӱлеш полышым пуаш.
Г.Кожевникова
